ASNN – Surprizë! Naftëtari ka arritur të fitojë derbin me Tomorin, ndërsa gjithçka është fiksuar në golin e shënuar nga Zylyftari në fundin e ndeshjes. Ndeshja ka nisur e qetë dhe të dyja ekipet dukeshin sikur studionin njëra-tjetrën. Rasti i parë do të vinte në minutën e 15-të, ndërsa miqtë kanë rrezikuar në një goditje dënimi, por Vashaku i vëmendshëm ka shmangur rrezikun. Pas disa rasteve shënimi për vendësit më të pastrin e ka pasur Bishaj, por Mema ka grushtuar, duke e dërguar topin jashtë, në goditje këndi.
Në minutën e 27-të, Naftëtari i ka pasur të gjitha shanset për të shënuar, por Zylyftari, i vetëm me portierin Vashaku, ka gabuar në gjuajtjen e tij. Në të 35-n, Papa ka ekzekutuar bukur një goditje dënimi, por Memaj grushton dhe jashtë. Sërish Naftëtari kundërsulmon, por Vashaku ka shmangur një gol të sigurt, ndërsa protagonistë të këtij rasti të humbur janë Zylyftari e Kopaçe. Myrto Uzuni do të rrezikonte seriozisht portën mike me një parabolë, në të 51-n minutë, por Memaj reagon në momentin e duhur.
Dhe atëherë kur dukej se ndeshja do të përfundonte barazim, Zylyftari do të ndëshkonte vendësit dhe Naftëtari do të merrte një trepikësh të artë. Në përfundim të ndeshjes, trajneri i Naftëtarit, Petraq Bifsha do të deklaronte: “Jam shumë i kënaqur nga loja e futbollistëve të mi. Fitorja ka ardhur në momentin e duhur dhe kjo gjë më gëzon shumë. Objektivi në këtë sfidë ka qenë të dalim me tre pikë nga kjo sfidë dhe në fund ia kemi dalë.”
“Në veçanti duhet të falënderoj ekipi për lojën e bukur që ka zhvilluar, ndërsa kemi marrë një fitore të vështirë ndaj një kundërshtari siç është Tomori i Beratit”, – ka përfunduar vlonjati i pankinës kuçovare.
Tomori – Naftëtari 0-1
Shënues: Zylyftari 90’
TOMORI: Vashaku, Avdo, Bitri, Bishaj, Kuçi, Ramazani, Myzyri (Gjata), Arbëri, Uzuni (Dervishi), Shinko (Sharavolli), Papa. Trajner: E. Memushi
NAFTËTARI: Memaj, Gucaj (R. Alushi), S. Gega, Daci, Kajo, Çekrezi, Hima (E. Alushi), Kopaçi, Mullaj, Zylyftari, Xhani (Çela). Trajner: P. Bifshaj
Gjyqtarë: K. Cjapi, I. Llupi, E. Begaj (Fier)
Kartonë të verdhë: Arbëri, Avdo, Kajo / Zylyftari, Daci
