ASNN – Në rrethana normale, Vedat Muriqit do t’i duhej edhe pak kohë për t’u kthyer në fushë pas dëmtimit të rëndë që pësoi në ndeshjen që Kosova fitoi ndaj Izraelit, në kuadër të Eliminatore të “Euro 2024”-ës. Por sulmuesi u kthye para kohe, pas dëmtimit të pësuar në nëntor dhe fundjavën e kaluar luajti 10 minutat e fundit të ndeshjes në barazimin e Majorkës ndaj Vijarealit. Për t’u kthyer më herët nga ç’pritej, Muriqi thotë se ka sakrifikuar shumë.
“Nuk kam kursyer asgjë për t’u kthyer sa më shpejt”, tha Muriqi të martën për të përditshmen e njohur të Kosovë “KOHA DITORE”. Ai këmbëngul se nuk kurseu asgjë edhe kur u paraqit për Kosovën në fushën e rënduar nga balta në stadiumin “Fadil Vokrri” të Prishtinës më 12 nëntor kundër Izraelit. “Nuk jam bërë pishman pse erdha dhe u dëmtova aty, sepse u dëmtova duke dhënë gjithë fuqinë që kam pasur për shtetin tim”, – ka theksuar golashënuesi më i mirë i Kosovës.
Me fanellën e përfaqësueses, Muriqi ka shënuar 26 gola në 50 ndeshje, ndërsa ndaj Izraelit ishte edhe kapiten i skuadrës. Para se të dëmtohej, Muriqi ishte shënuesi më i mirë tek skuadra e elitës spanjolle, Majorja, teksa në 13 ndeshje në La Liga këtë edicion, ai ka shënuar 4 gola dhe ka dhënë edhe dy pasime për gol. “Jam shumë i lumtur për kthimin në fushë, – thotë Muriqi për median në fjalë. – Por ende nuk jam në 100 % të mundësive të mia.”
Me kalimin e kohës dhe ushtrimeve që do t’i kem, do të bëhem gati shumë shpejt, – ka vijuar ai. – Kam sakrifikuar shumë në këtë periudhë të lëndimit. E ndiej veten më të fuqishëm.” 29-vjeçari Muriqi është i lumtur që ka ende mundësi t’i shërbejë Kosovës. “Kur luaj me fanellën e Kosovës e shijoj çdo sekondë dhe ndihem krenar dhe i privilegjuar që kam mundësi të luaj për Kosovën”, – shton sulmuesi, i cili uron të mos tërhiqet nga Përfaqësuesja “Dardane” pa përjetuar emocionet e paraqitjes në Botëror apo Evropian.
