ASNN – Triumfi i Shqipërisë në Evropianin e mundjes, Presidenti i Federatës, Sahit Prizreni, rrëfen posaçërisht për RTSH-në rrugën drejt medaljeve. Shqipëria kthehet nga Kampionati Evropian i Mundjes me një titull të kampiones së Evropës, të siguruar nga Islam Dudajev, dhe një të nënkampiones së kontinentit, të siguruar nga Zelimkhan Abakarov.

Dhe, në një lidhje të drejtpërdrejtë me RTSH-në, Presidentin e Federatës Shqiptare të Mundjes, Sahit Prizreni, ka rrëfyer rrugën drejt medaljeve. “Arritjen e Islamit unë e kam pritur dhe kam kohë që e kam besuar, – ka thënë ai fillimisht. – Por më në fund u arrit dhe ajo çfarë e bën më të mirë është se djali ka fituar besimin. Pra atë besim që i duhet një sportisti në një vit kaq të rëndësishëm.”

Sigurisht që ishte e mundur për dy të arta, Sahit Prizreni, ashtu si Abakarov nuk e fsheh zhgënjimin, por pa harruar të hedhë vështrimin përpara. “Kur je kaq afër dhe kur je edhe para me pikë, sigurisht që fillon ta besosh”, – ka rrëfyer ai. – Jo se nuk e besuam, por dua të them se Abakarov ka bërë një ndeshje fantastike. Të mos harrojmë që është kualifikuar në 57 kg dhe është “kampion” i botës në këtë peshë.”

“Por për të ruajtur energjitë, ai ka garuar në peshën 61kg. Për mua, ai është sidoqoftë “kampion” i Evropës. Sigurisht që ndjej keqardhje që nuk arriti të artën, por mund të them se viti është nisur në mënyrën më të mirë të mundshme, djemtë na kanë bërë të ëndërrojmë dhe mendojmë për medalje olimpike, ai është synimi”, ka përfunduar Presidenti i Federatës Shqiptare të Mundjes, Sahit Prizreni.