ASNN – Shqipëria mori pjesë në turneun ndërkombëtar të mundjes të quajtur Kupa e Akropolit (“Acropolis Cup 2019”), duke zënë vendin e 3-të si ekip. Pra ishte një paraqitje dinjitoze e mundjes shqiptare me skuadrën e paratërinjve, ku spikatën mundësit e vegjël të moshës deri në 15-vjeç si në stilin klasik (greko-romak), ashtu dhe në stilin e lirë. Pas zhvillimit të ndeshjeve, Shqipëria e mbylli këtë veprimtari me 5 medalje, 4 argjendi e një bronzi.

Në stilin e lirë, medalje argjendi morën Klevis Prençi dhe Maringlen Beqiraj, kurse medalje bronzi në këtë stil mori Ervis Basha. Në stilin klasik, medalje argjendi si vend i dytë morën Ergi Uku dhe Jurgen Yzeiraj. Sipas asaj që thekson Federata Shqiptare e Mundjes, këto medalje tregojnë për një paraqitje të nivelit të lartë të mundësve të vegjël shqiptarë, që u përballën me dinjitet në këtë veprimtari ndërkombëtare.

Padyshim, kjo është shenjë e mirë për të ardhmen e mundjes, si në stilin e lirë dhe në atë klasik, por Shqipëria ka ende shumë punë në këtë sport për të rikthyer masivitetin, pasi ky sport ka traditë dhe mund të ketë edhe rezultate të larta ndërkombëtare. Medaljet e sportistëve kuqezinj tregojnë se mundja e nisi mbarë këtë vit dhe shpresohet që të kapë edhe normën olimpike me dy apo tre sportistë që të përfaqësohet në vitin 2020 në Olimpiadën e Tokios, objektiv madhor për federatat sportive shqiptare.

Pjesëmarrësit nga Shqipëria

Mundja e Lirë

Klevis Prençi                        41 kg

Ylli Xhani                  44 kg

Ervis Basha              48 kg

Orgito Visha              57 kg

Maringlen Beqiraj    60 kg

Mundja klasike

Ergi Uku                    41 kg

Jurgen Yzeiraj          41 kg

Enea Basha              52 kg

Ardit Zeneli               57 kg