Presidenti Biba: “Do t’i bëjmë të gjitha turnetë kualifikues për në “Rio de Zhaneiro 2016””. Egzon Shala cilësohet mundësi më i mirë dhe si i vetmi që mund të sjellë medalje ndërkombëtare. Federata Shqiptare e Mundjes, me President Martin Bibën dhe Sekretar të Përgjithshëm Ndriçim Spahiu, dje ka zhvilluar analizën vjetore, ndërsa viti 2015-të do të jetë jo vetëm vit i kualifikueseve për në Lojërat Olimpike “Rio de Zhaneiro 2016”, por dhe viti zgjedhor. Sepse Biba ka bërë të ditur se Federata Shqiptare e Mundjes do t’i nënshtrohet rregullit për të zgjedhurit e rinj një herë në katër vjet.
“Unë jam i detyruar t’ju falënderoj për kontributin tuaj këtë viti, ndërsa jemi këtu për të dhënë llogari dhe të bëjmë gjithçka së bashku për rritjen cilësore të këtij sporti në vend, – ka thënë paraprakisht presidenti Biba, ndërsa ka numëruar veprimtaritë kombëtare dhe ndërkombëtare që janë bërë për vitin 2014. – Për veprimtaritë ndërkombëtare më duhet të them se kam qenë edhe vetë i pranishëm, ashtu sikurse kam qenë edhe në kongresin zgjedhor të Federatës Botërore të Mundjes, atje ku u zgjodh Nenad Laloviç, ndërsa u bë dhe kërkesa që duhet të jetë sport olimpik.”
“Dhe më pas në Monako u pranua si e tillë, – ka vijuar ai. – Përtej kësaj kemi punuar për të arritur rezultate të mira, ndërsa granti është rritur sivjet. Jo vetëm kaq, Egzon Shala është sportisti më i mirë, ndërsa si Federatë kemi detyrimin për të marrë pjesë në të gjitha Kampionatet Evropiane dhe Botërore, pse jo për të qenë me normë kualifikimi në Lojërat Olimpike. Mendoj se do të jemi me ekip të plotë në Lojërat Olimpike Evropiane në Baku. Kurse sivjet do t’i nënshtrohemi dhe zgjedhjeve. Duhet të falënderojmë për kontributin e tij dhe presidentin e nderit të mundjes, Doktor “Honoris Causas”, Muhamet Malo.”
“Shpresoj që gjithçka të bëjmë mirë bashkë, ndërsa në qendër të vëmendjes duhet të kemi dhe ngritjen e mundjes për femra, po pse jo dhe në bordin drejtues të kemi femra, ashtu sikurse ndodh në bordin e Federatës Botërore të Mundjes”, – ka përfunduar Biba. Më pas Sekretari i Përgjithshëm i Federatës Shqiptare të Mundjes, Ndriçim Spahiu, ka bërë raportin e veprimtarive për vitin 2014, ndërsa është bërë edhe raporti financiar. Anëtarët e klubeve kanë ngritur shqetësimet e tyre në lidhje me gjykimin, në lidhje me një transparencë më të plotë për financat, në lidhje me gjetjen e sponsorëve, në lidhje me kërkim shkencor.
Por çështja më e nxehtë në mundje ka qenë bursa e munguar olimpike për Egzon Shalën, apo dhe pozicioni që KOKSH mban ndaj Federatës Shqiptare të Mundjes. Dhe realisht dje përfaqësuesit e Komitetit Olimpik Kombëtar Shqiptar kanë qenë të ftuar për të marrë pjesë në këtë asamble të mundjes, ata nuk kanë ardhur. Kurse për Ministrinë e Arsimit dhe Sportit ka qenë përfaqësues Uvil Zajmi, i cili në fund dhe ka përshëndetur. Përfundimisht, përtej debateve, mundja shqiptare e ka zhvilluar qetësisht asamblenë e saj dhe bëhet tashmë gati për të nisur veprimtaritë e saj kombëtare e ndërkombëtare.
