ASNN – Mundja shqiptare ka analizuar të premten në mesditë vitin 2017-të, ndërsa ka shpallur dhe objektivat për 2018-ën. Në prezencë të shefit të politikave dhe strategjive për sportin dhe rininë në Ministrinë e Arsimit, Sportit dhe Rinisë, Arjan Konomi, mundja ka evidentuar se viti 2017 ka qenë i mirë. Sepse, të paktën edhe sipas presidentit të Federatës Shqiptare të Mundjes, Martin Biba, vendi i 5-të në Botërorin e Të Rinjve të Eriglent Prizrenit, titujt “kampion Ballkani” të Paris Karepit dhe Eriglent Prizrenit, apo dhe medalja e bronztë e Boris Frrokajt tregojnë që mundja ka rritje.
“Unë, – thotë Biba për të përditshmen sportive shqiptare, “Sport Ekspres”, – do ta cilësoja një vit të mirë, sepse kemi pasur dhe medalje të tjera. Së paku kemi bërë 18 aktivitete kombëtare dhe ndërkombëtare dhe kjo me një “grant” fare të vogël. Mos harroni që kemi pasur dhe aksidente si ai i sportistit premtuesm Leonard Frrokajt, që për fatin tonë të mirë tashmë e ka kaluar rrezikun dhe është duke u rehabilituar në një qendër në Soçi. Megjithatë them se po vjen një brez në rritje që do të ketë dhe rezultate më të mëdha.”
E pyetjes së “Sport Ekspres” se çfarë mund të kishin bërë më tepër në 2017-ën, Biba do t’i përgjigjej me “financa më të mëdha”. “Nëse do të kishim pasur financa të mëdha do të kishim dërguar me shumë ekipe në turne ndërkombëtar, por do të kishim dhe ekipe kombëtare më të plota, kjo dhe në uniforma apo gjithçka tjetër që do të rregullonte pamjen e tyre të jashtme, – ka thënë ai. – Megjithatë tani jemi në ato kushte që kemi kërkuar dhe zhvillimin e Kampionatit Ballkanik të kadetëve dhe të rinjve më 2018-ën në Tiranë dhe po presim përgjigje.”
Por ndërkohë tek objektivat e 2018-ës, Biba do të këmbëngulte për më shumë medalje ndërkombëtare. “Tanimë, – thotë presidenti i mundjes shqiptare, – kemi një brez sportistët që janë të pjekur e që duhet të bëjnë hapin e madh për t’u ndeshur si të barabartë dhe me kundërshtarë nga Rusia, Shtetet e Bashkuara të Amerikës, Turqia, apo Bjellorusia. Pra me vende që e kanë të zhvilluar mundjen. Besoj se do të kemi shumë medalje.”
