ASNN – Janë zhvilluar sot provat zyrtare të Çmimit të Madh të Italisë dhe kohën më të shpejtë e ka regjistruar veterani Valentino Rosi, i cili do të niset i pari në garën e së dielës. Ashtu sikundër edhe provat zyrtare të shtunën, edhe kjo garë e së dielës do të sillet për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 13:45. Është pista e shtëpisë dhe ai ka dëshmuar se mbetet “i zoti i shtëpisë”.
Valentino Rosi ka dëshmuar se mbetet prapëseprapë një pilot i madh, teksa ka triumfuar në provat zyrtare të Çmimit të Madh të Italisë, duke regjistruar kohën më të shpejtë, pasi e përshkroi xhiron në pistën e Muxhelos për 1 minutë, 46 sekonda e 208 të mijëtat. Në krah të numrit legjendar, 46, do të rreshtohet numri 99, një tjetër pilot me një karrierë po aq të pasur.
Është Horhe Lorenco i “Dukati”-it, rekordin e të cilit Rosi ka barazuar me 65 nisje nga vendi i parë në karrierë. Në fakt, vetëm 35 të mijëtat i kanë ndarë dy ish-shokët e skuadrës tek “Jamaha” , ndërsa rreshtin e parë do ta plotësojë një tjetër “Jamaha”, Maverik Vinjalesi, i cili shkëlqeu në seancën e dytë të këtyre provave zyrtare. Një tjetër djalë i shtëpisë, Andrea Ianone, i cili kishte kryesuar për shumicën e fundjavës, u detyrua të kënaqet me një vend të 4-t.
Pra do të niset nga rreshti i dytë, kurse përkrah tij do të rreshtohen Danilo Petruçi i “Pramak”-ut, i cili u ngjit në podium në garën e vitit të shkuar, si dhe kampioni në fuqi I botës, Mark Markez i “Repsol Honda”-s. Fituesi i garës së 2017-ës në Muxhelo, Andrea Doviciozo i “Dukati”-t do të niset nga vendin i 7-të, ndërsa rreshtin e 3-të do të plotësojnë britaniku Kal Kraçlou i “LCR Honda”-s e Johann Zarko i “Monster Yamaha”-s.
Dhjetëshen e të parëve do ta plotësojë Aleks Rinsi i “Suzuki”-t. Ashtu si provat zyrtare të shtunën, edhe kjo garë e së dielës do të sillet për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 13:45.
