ASNN – Moto GP-ja rikthehet në Itali për Çmimin e Madh që zhvillohet në Muxhelo dhe në konferencën për shtyp janë të shumtë pilotët që nënvizojnë rëndësinë e fitores aty. “Kjo është gara më e veçantë e vitit. Këtu është shumë e rëndësishme të japësh më shumë se maksimumi” – konfirmon Valentino Rosi. “Të fitosh në shtëpi, përpara tifozëve të tu, është fantastike” – shton Andrea Doviciozo. Muxhelo mbetet Muxhelo, sidomos për një pilot italian.

Pistë tepër e veçantë, aty ku fitorja merr një domethënie. Dhe në konferencën për shtyp, pilotët tregojnë arsyet se pse Çmimi i Madh i Italisë është kaq special për ta. “Muxhelo është pista më speciale e sezonit për gjithë pilotët italianë, sepse historikisht ne e konsiderojmë si Çmimin e Madh të Italisë, – ka thënë Valentino Rosi. – Pista është me të vërtetë fantastike, e ka diçka ndryshe nga pistat e tjera të Botërorit. Edhe Mizano është e jashtëzakonshme, por këtu është e veçantë.”

“Atmosfera e tifozëve përgjatë gjithë pistës, sidomos të dielën është me të vërtetë shumë emocionuese, – ka vijuar ai. – Ndaj është shumë e rëndësishme që ne të japim maksimumin aty. Sidomos për pilotët italianë që kanë edhe mbështetjen e gjithë publikut.” Por edhe Andrea Doviciozo, i cili ka aty fituar me “Dukatin” në 2017, e quan atë një nga momentet më të bukura në karrierë, teksa thotë: “Për fat, në 2-3 vitet e fundit kam fituar shumë gara e kam patur momente të paharrueshme”.

“E fitorja këtu në 2017 është ndër më të veçantat, – ka vijuar ai. – Të fitosh përpara tifozëve të tu është me të vërtetë fantastike. Edhe këtë fundjavë duam të bëjmë diçka speciale për të gjithë tifozët tanë.” Në tokën toskane paraqitet me objektivat e veta edhe Mark Markez. “Jam pak i sëmurë, por uroj që deri sa të vijë gara të jem më mirë” – bën shaka spanjolli, kryesues i renditjes së përgjithshme të pilotëve dhe “kampion” në fuqi i botës.

“Që nga Katari jemi përmirësuar mjaft dhe jam i bindur se motori do të japë më të mirën, – vijon ai. – Vitin e kaluar ishim mirë por u rrëzova në garë. këtë vit do të kërkojmë të japim maksimumin. E di që kjo është pistë e rëndësishme për “Dukatin” dhe pilotët italianë, por për mua është një garë si gjithë të tjerat dhe do të përqendrohemi te puna në skuadër.”