ASNN – Kampionati Botëror i Motoçiklizmit është zhvendosur këtë fundjavë në Austri, në pistën e Shpilbergut, ku të shtunën janë zhvilluar provat zyrtare. Mark Markez do ta nisë i pari garën e së dielës, pasi ishte më i shpejti, duke lënë prapa me vetëm 2 të mijëtat e sekondës Andrea Doviciozon. Gara e 11-të e sezonit premton një tjetër spektakël dhe gjithçka do të vijë për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 14:00.
Piloti i “Hondës”, Mark Markez do të niset i pari të dielën në garën e Çmimit të Madh të Austrisë në Moto GP, pasi triumfoi me vetëm dy të mijëtat e sekondës në një betejë epike me “Dukati”-in e Andrea Doviciozos. Ndërkohë, ajo që bën përshtypje, është se Valentino Rosi do të niset nga vendi i 14-të, pas një séance provash zyrtare për t’u harruar. Ky pozicioni i veteranit italian të “Jamaha”-s ishte nisja më e keqe për të që nga Çmimi i Madh i Australisë në 2016-ën, kur u nis nga vendi i 15-të.
Në një pistë ku shpejtësia maksimale dhe aftësia për ta përshpejtuar ritmin janë vendimtare, “Dukati” hyri në 15-minutëshin e fundit të provave zyrtare si favorite. Dhe, në një betejë 3-she me dy rivalët e skuadrës italiane, kampioni në fuqi i botës triumfoi me vetëm dy të mijëtat e sekondës ndaj Doviciozos, që do të niset të dielën nga vendi i dytë, ndërsa rreshtin e parë do ta plotësojë spanjolli tjetër, Horhe Lorenco. Në rreshtin e dytë, vendin e 4-t e mban Danilo Petruçi.
Ndërsa në krah të tij do të vendoset “LCR Honda” e Kal Kratçlout, por edhe Johan Zarko. Sa i përket dyshes së Suzukit, Andrea Janone dhe Aleks Rinsi, ishin në vendin e 8-të dhe të 10-të përkatësisht, kurse midis tyre u vendos Dani Pedroza.
