ASNN – Kampioni i sapokurorëzuar i botës flet për francezin 20-vjeçar, e sheh si pretendent. Gëzimi i një tjetër triumfi botëror nuk ka arritur t’ia errësojë arsyen për të parë drejt së ardhmes. Dhe menjëherë pas një gare të gjatë, si ajo e së dielës në Tajlandë, Mark Markezi i ka të qarta idetë, teksa thotë pa mëdyshje: “Fabio Kuartararo është një nga rivalët kryesorë vitin e ardhshëm”. Ka festuar si i çmendur, dhe me të drejtë, titullin e 8-të të Kampionit të botës në motoçiklizëm dhe të 6-tin në Moto GP, por gëzimi nuk ka arritur t’ia errësojë arsyen për të parë drejt së ardhmes.
Dhe menjëherë pas një gare të gjatë, Mark Markezi i ka të qarta idetë, teksa thotë pa mëdyshje: “Fabio Kuartararo është një nga rivalët kryesorë vitin e ardhshëm”. Edicioni i dytë i Çmimit të Madh të Tailandës ishte një tjetër garë epike, kur Markezi korri fitoren e tij të 9-të këtë sezon, por edhe titullin e 8-të të kampionit të botës, por, përtej festimeve, lajmi më i madh ishte se piloti i “Jamaha”-s kliente të “Petronas”-it, Fabio Kuartararo, sërish bëri një garë “rrotë më rrotë”, në kuptimin e vërtetë të fjalës, me Markezin, në atë që është një rivalitet i sapolindur, por që po rritet dhe ashpërsohet çdo ditë e më tepër.
Edhe pse ky Botëror i 2019-ës foli i gjithi për Markezin dhe statistikat nuk të lënë të gënjesh, po kaq e vërtetë është që djaloshi i ri me “Jamaha” ka hyrë furishëm në skenën e nivelit më të lartë të Kampionatit të Motoçiklizmit. Dhe vetë Markez e di se Kuartararo do të jetë një kandidat për titull sezonin e ardhshëm, çka e bën 2020-ën një premtim të madh për spektakël. “Fabio është një nga pretendentët për titull vitin e ardhshëm”, – tha spanjolli menjëherë pas triumfit të tij, duke vijuar: “Ai e nget “Jamaha”-n në një mënyrë shumë të mirë.”
“Ai e shfrytëzon gjatë gjithë kohës pistën dhe ai gjen një mënyrë që ta ruajë shpejtësinë nëpër kthesa shumë, shumë të madhe, – ka theksuar spanjolli, duke folur për francezin. – Ai po bën diferencën.” Por, a ndjehet gati vetë Kuartararo? “Jamaha” i ka dhënë 20-vjeçarit një motor të mirë dhe, me shumë më tepër përmirësime të premtuara për 2020-tën, francezi i mbiquajtur “El Diablo” flet me siguri në vetvete. “Unë ndjehem mëse i gatshëm, edhe pse ky ishte viti im i parë në këtë nivel, – thotë ai, duke vijuar: “Unë i njoh tanimë pistat, por duhet pranuar se këtë viti nuk isha ende gati.”
“Por padyshim që për vitin që vjen do të jem gati dhe padyshim që do të përpiqen ta sfidoj Markezin”, – ka përfunduar Fabio Kuartararo. Sidoqoftë, me 4 gara të mbetura në kalendar dhe pa trysni, beteja Markez-Kuartararo premton spektakël edhe Japoni, Australi, Malajzi dhe Valencia.
