ASNN – Horhe Lorenco ka pohuar se ai po shqyrton mundësi të tjera përtej “Dukati”-it sa i përket sezonit të ardhshëm të nivelit më të lartë të Kampionatit Botëror të Automobilizmit, Moto GP-s. 3 herë kampioni i botës në këtë nivel dhe skuadra e italiane duket se do të ndahen shumë shpejt, pas një marrëdhënieje të turbullt 18-mujore, që ende nuk ka prodhuar asnjë fitore në pistë.

Sipas mediave ndërkombëtare, Lorenco mund të përfundojë me ndonjë skuadër kliente të “Jamaha”-s tekse mundësitë e tij për zgjedhje pakësohen çdo ditë. Piloti i “Pramak”-ut, Danilo Petruçi, la të nënkuptohej pas garës së mëparshme të La Manshit se “Dukati” do të zgjidhte ose atë ose shokun e tij të skuadrës, Xhek Millerin, si partner të Andrea Doviciozos në skuadrën e 2019-ën.

Kjo deklaratë u pasua nga fjalët e kreut ekzekutiv të “Dukati”-t, Klaudio Domenikali, i cili shprehu keqardhjen gjatë një takimi me mediat, se basti i “Dukati”-t me Lorencon, që u josh nga “Jamaha” me një kosto të madhe, nuk ishte materializuar. “Lorenco është një pilot i madh, por që nuk ia ka dalë të marrë maksimumin nga motori ynë, një motor që ka disa pika të forta, por edhe disa dobësi”, – pati deklaruar Domenikali.

“Fatkeqësisht, as ai e as mekanikët nuk kanë arritur ta shfrytëzojnë në maksimum talentin e tij dhe kjo është ajo shija e hidhur që na mbetet nga kjo marrëdhënie”, – ka shtuar ai. Duke iu referuar këtyre fjalë, por pa dashur t’i komentonte ato, Lorenco deklaroi të enjten në Muxhelo se po shikonte për alternativa të tjera që të qëndronte në pistën e Moto GP-së në 2019-ën.

“Ne po shikojmë për të tjera zgjedhje përveç “Dukati”-t, – tha ai, duke shtuar: “Mund të them vetëm se jam një pilot i madh, një kampion.”