ASNN – Janë zhvilluar sot provat zyrtare të Çmimit të Madh të Austrisë në Moto GP dhe do të jetë italiani i “Dukati”-t, Andrea Janone ai që do të niset i pari në garën e nesërme. Valentino Rosi i “Jamaha”-s do të niset nga vendi i dytë, pasi u mund nga bashkëatdhetari i tij, ndërsa i treti që do të plotësojë rreshtin e pari të garës së nesërme është Andrea Doviciozo.

Andrea Janone ka arritur në mënyrë të pabesueshme të regjistrojë kohën më të shpejtë të provave zyrtare të Çmimit të Madh të Austrisë në Moto GP, duke triumfuar në një betejë katërshe. Valentino Rosi i “Jamaha”-s do të niset nga vendi i dytë, pasi u mund nga bashkëatdhetari i tij, ndërsa i treti që do të plotësojë rreshtin e pari të garës së nesërme është Andrea Doviciozo.

Janone, i cili po garon pavarsisht dhimbjes që i ka shkaktuar një aksident me motokros gjatë pushimeve verore, e siguroi vendin e parë pasi ishte mbyllur koha zyrtare, duke i mohuar italianit tjetër, Valentino Rosi, vendin e parë. Kjo ishte vetëm hera e dytë në karrierë që ai do të niset nga vendi i parë. Rosi, pati udhëhequr deri në sekondat e fundit dhe 9-herë kampioni i botës u detyrua të kënaqej me nisjen nga rreshti i parë.

Horhe Lorenco i “Jamahas”, Mark Markez i “Hondës” dhe Maverik Vinjales i “Suzukit” plotësuan një rresht të dytë të gjithin spanjoll. Sikundër i gjithë ky sezon i Kampionatit Botëror të Motoçiklizmit, edhe gara e së dielës në Austri do të sillet për sportdashësit drejtpërdrejt nga Rrjeti i Radio-Televizionit Shqiptar.