ASNN – Horhe Martìn arrin vendin e parë në nisje për të dytë herë radhazi në Shpilberg. Në fundjavën e dytë në këtë pistë, ku Moto GP do të zhvillojë Çmimin e Madh të Austrisë, spanjolli arrin të vendoset në vendin e parë në nisje. Madje ka vendosur edhe kohë rekord të pistës. Pas tij, nga vija e parë nisen Fabio Kuartararo dhe Françesko Banjaja. Një rezultat i jashtëzakonshëm ky i Horhe Martin në Austri.

Piloti i skuadrës kliente të “Dukati”-t, “Pramak”-ut arrin të sigurojë vendin e parë në nise në garën e dytë austriake duke vendosur edhe rekord në këtë pistë, gjatë provave zyrtare të së shtunës, me kohën 1 minutë, 22 sekonda e 643 të mijtat. Për pilotin e “Dukati”-t ky është i dyti radhazi në Shpilberg me motorin “Desmosediçi” të skuadrës “Pramak Dukati” dhe i 3-ti në këtë Botëror.

Duket se piloti debutues në Moto GP, po e merr veten garë pas gare, duke treguar se nuk është rastësisht në këtë kategori motorësh. Moto GP zhvillon të dielën garën e dytë radhazi në pistën austriake. Piloti spanjoll ka lënë pas dy nga pilotët pretendentë për titullin “kampion bote”, Fabio Kuartararon me “Jamaha”-n zyrtare, me vetëm 34 të mijëtat më i ngadaltë, dhe Françesko Banjajën me “Dukati”-n zyrtar.

Kjo do të jetë edhe vija e parë e nisjes për Çmimin e Madh të Austrisë, së zhvillohet të dielën. Në vijën e dytë të nisjes janë Johan Zarko, Mark Markez dhe Xhek Miller. Duket se gara të dielën do të jetë e fortë, pasi pretendentët për titull janë shumë pranë njëri tjetrit. Midis 10 më të mirëve në nisjen e garës janë edhe Joan Mir, Aleiks Espargarò, Migel Oliveira dhe Brad Binder.