ASNN – Në Mizano, Markez dhe Espargaro në vend të parë e të dytë. 728 ditë. Kanë kaluar pothuajse dy vite që nga hera e fundit që Honda fitoi një Botëror të Moto GP-së. Hera e fundit ishte në Australi në 2019-ën, si gjithnjë me Mark Márkez që fitoi garën në “Filip Ajlënd”, pasi ishte shpallur “kampion bote” për herë të 8-të dhe me Kal Kratçlou, atëherë me “LCR Honda”, që e shoqëroi në vendin e dytë të podiumit. Që atëherë, shumë presion dhe, mbi të gjitha, shumë zhgënjime tek “Honda” për shkak të mungesës së rezultateve që nuk arritën pavarësisht përpjekjeve të bëra çdo fundjavë.
Të dielën e kaluar, në Mizano, “Honda” u rikthye sërish si marka kampione që ka qenë gjithmonë. Mark Márkez fiton në një cirkuit, në të cilin ai nuk grumbullon rezultate të shkëlqyera dhe nuk është një nga të preferuarit e tij. Kjo është arsyeja pse është shumë më e rëndësishme. Sidomos kur spanjolli ende nuk garon ashtu siç do të dëshironte, shpatulla e tij e djathtë vazhdon ta mundojë. Një goditje autoriteti. “Për Markun, kjo është një periudhë edhe më e vështirë se për të tjerët, – vlerëson pas fitores në Mizano.
“Ai është ende duke u rikuperuar, ka ende probleme, nuk është ende i njëjti, ai e di dhe ne e dimë, – vijon Puig. – Prandaj kjo fitore në Mizano. sidomos në këtë pistë ka edhe më shumë vlerë për të. Askush nuk e di se çfarë po bën Marku përveç tij.” E njëjta gjë ka ndodhur edhe me Pol Espargarónë, i cili u ngjit në vendin e dytë të podiumit. Sigurisht, me meritat e veta. Pa dyshim, Mizano është një pikë kthese për besimin e tij në lidhje me “Honda”-n. “Pol Espargaró ka duruar një sezon shumë të vështirë në të cilin kishte pritshmëri të mëdha”, – tha Puig. – Ne e dimë se nuk ka qenë e lehtë, por pika pozitive është se ai kurrë nuk dorëzohet.”
“Ai gjithmonë përpiqet të gjejë një zgjidhje”, – vijoi drejtuesi i skuadrës japoneze. Pas kësaj fitoreje në Mizano, “Honda” dëshiron ta mbyllë mirë sezonin. “Ky është një ekip fitues dhe qëllimi ynë është të përpiqemi gjithmonë të fitojmë dhe të luftojmë për titullin çdo vit. I vetmi ndryshim është se ndonjëherë situata nuk është perfekte. Dy vitet e fundit nuk kanë qenë të lehta për ne, por nuk do të gjeni askënd brenda këtij ekipi që dëshiron ta mbyllë garën e radhës në vend të dytë. Ne do të shkojmë në garën tjetër duke u përpjekur të fitojmë përsëri sepse kjo është “Honda”,” – përfundoi menaxher i ekipit të “Repsol Honda”-s, Alberto Puig.
