ASNN – Thonë se, ngandonjëherë, kur të vjen e keqja, hapi derën. Pikërisht kur çështja e rinovimit të tij është në qendër të spekulimeve, Andrea Doviciozo u përball me fatin e keq në një garë të kampionatit rajonal të motorëve në Emilia Romanja, ku ai u rrezua dhe u dëmtuar në shpatullën e majtë, gjë që e detyroi t’i nënshtrohej një ndërhyrjeje kirurgjikale. Në spitalin e Modenas, mjekët i kanë vendosur një pllakë titani në shpatull, me qëllim të shpejtojnë shërimin e tij.
Por, nëse gjithçka shkon siç është planifikuar, Andrea do të jetë gati për garën e parë të Botërorit të Moto GP-së, që do të mbahet në Herez, më 19 korrik 2020. “Dovi” mori pjesë në këtë garë me miratimin e “Dukati”-t, dhe ky dëmtim nuk do të ndikojë aspak në marrëdhënien midis pilotit dhe skuadrës. E cila për hir të së vërtetës nuk është aspak e mirë pas kërkesës së pilotit italian për të rritur pagën e tij, në prag të rinovimit të kontratës me “Dukati”-n.
“Nëse më telefonojnë për të fituar një Botëror, unë do të pranoj” – ka thënë ndërkohë Horhe Lorenco disa ditë më parë. Këto fjalë janë thënë, pas hipotezës që piloti spanjoll mund të vishet sërish me të kuqe. Ndërkohë, mundësia për të marrë sërish një motor “M1” të “Jamaha”-s, me të cilin ai fitoi 3 tituj botërorë, sidoqoftë ekziston. Nuk do të ishte një alternativë që do të binte në vesh të shurdhër, edhe pse ishte disi e pamundur, sepse tashmë janë konfirmuar dy pilotët e ekipit zyrtar.
Maverik Vinjales dhe Fabio Kuartararo do të jetë pilotët e skuadrës zyrtare të prodhuesit japonez që nga viti 2021, ndërsa në ekipin klient, “Petronas” ata i besojnë Franko Morbidelit, duke pritur edhe një përgjigje pozitive nga Valentino Rosi për të konkretizuar dyshen e pilotëve të vet. E gjithë kjo e bën edhe më intriguese atë që po ndodh midis “Dukatit” dhe Andrea Doviciozos, me të dyja palët që, përtej fjalëve të bukura, po bëjnë ende lojën e pritjes.
