Diçka serioze duhet të ketë ndodhur në mjediset e Federatës Shqiptare të Futbollit, apo të paktën për sa kohë janë rritur ndjeshëm parametrat e sigurisë. Nëse më parë personi i sigurisë ishte “i padukshëm”, dje kishte zënë pozicion mbulimi në hollin pritës të institucionit, duke dëshmuar se diçka nuk shkon normalisht dhe është krejt e pazakontë. Tensioni në prag të ndeshjes me Serbinë është shumë i madh dhe kjo është e dukshme.
Dalja në skenë e krizës së debitorëve ndaj FSHF-së në Kategorinë e Dytë duket qartë të jetë një manovër e federatës dhe krerëve të saj për të larguar vëmendjen nga situata e vështirë e biletave, të cilat nuk kanë shkuar në duart e tifozëve, por njerëzve me pushtet, ose sekserëve të federatës. Po ashtu, FSHF është nën presionin e opinionit për rezultatin, ashtu sikurse ekipi kombëtar, të cilit i duhet medoemos fitorja ndaj serbëve.
Të gjitha këto nuk janë të rastësishme dhe përbëjnë një gamë ngjarjesh dhe situatash që lidhen me patjetër me dy ndeshjet e ardhshme të kuqezinjve, por edhe me presionin që po bie tek presidenti dhe zyrtarët e tjerë të lartë të këtij institucioni. Është ora 10:30, mbërritja e gazetarit të të përditshmes shqiptare, gazetës “SOT” në FSHF nuk pritet me sy të mirë. Është thënë dhe më herët se gazetarët janë krijesa më e keqe për zyrtarët e federatës.
Kërkesës së tij për të marrë të dhëna mbi arsyet e një ndërhyrje të tillë për ndërprerjen e ndeshjeve të Kategorisë së Dytë të Kampionatit Kombëtar të Futbollit në fillim nuk i përgjigjet askush, me arsyetimin “madhor” se zyrtarët janë të zënë. Më pas vjen punonjësja e marrëdhënieve me median. Pas buzëqeshjes së saj piktoreske dhe të papërsëritshme, shfaqet një nervozitet jo i pakuptimtë, i cili në fytyrën e bukur të punonjëses merr karakter dramatik.
Pas insistimit të gazetarit për të marrë informacionin e kërkuar, më në fund shefi i sektorit të garave Lysien Nurishmi, i vetmi në dy dekada që ruan integritetin e tij në FSHF dhe i vetmi që në fakt të sqaron për çfarëdo që ta pyesësh, arrin të qartësojë situatën. Në fund, rikthimi i buzëqeshjes së punonjëses nuk lidhet me qartësimin dhe dhënien e informacionit, por me largimin e gazetarit nga ambientet e zyrave përballë ambasadës amerikane.
Sot FSHF është si bunker, ku informacioni, edhe pse me ligj në interes të publikut, jepet me shumë vështirësi. Shkurt: FSHF u bën luftë mediave, sepse ajo i trembet pisllëkut të vet.
