ASNN – Veprimtaria e dytë e rrjetës së femrave në vend, Kupa e Shqipërisë, ka nisur të premten fazën e ndeshjeve në grupe, nga ku do të dalin dhe 4 skuadra gjysmëfinalist, që do të luftojnë më tej për këtë trofe. Kjo fazë ka nisur të premten dhe, në grupin A, Partizani dhe Mirdita kanë korrur fitore të lehta në 3 sete, ndërsa të shtunën do të përballen me njëra-tjetrën në sfidën direkte që do të vendosë praktikisht kreun e renditjes.

Dy ndeshjet e para të Grupit A, të vlefshme për Kupën e Shqipërisë në volejboll për femra, janë luajtur në Pallatin e Sportit “Ramazan Njala” të Durrësit. Në këtë grup bëjnë pjesë ekipet e Partizanit, Lushnjës, Teutës e Mirditës. Dita e parë nuk pati të papritura, sepse dy skuadrat pretendentë fituan me lehtësi 3-0 ndaj rivaleve të tyre. Partizani mposhti pa shumë mund Teutën në përballjen që çeli këtë turne.

Megjithëse durrsaket luanin në fushën e tyre, luajtën dobët, duke mos përballur dot ritmin e diktuar nga volejbollistet kryeqeytetase. Loja e Teutës ishte e dobët në përgjithësi, duke rivalizuar vetëm në pikët e para, pasi më tej në fushë dominonte Partizani i trajnerit Roland Tarja, që shkëputej pa shumë probleme, duke i fituar të 3 setet pa shumë probleme.

E njëjta pamje edhe në ndeshjen tjetër të këtij grupi, ku Mirdita arriti një fitore edhe më të shpejtë ndaj Lushnjës, në përballjen e dy ekipeve që e mbyllën fazën e parë të kampionatit në skajet e kundërta të renditjes. Skuadra rrëshenase luajti në këtë ndeshje me të njëjtin ritëm si në kampionat, duke arritur një fitore pa shumë mund. Nesër do të luhet edhe sfida e kreut Partizani-Mirdita, që përcakton edhe vendin e parë në grup.

Kupa e Shqipërisë

Volejboll – Femra

Grupi A

Dita e parë, 30 nëntor 2018:

Partizani – Teuta                   3-0

(25-19, 25-12, 25-19)

Mirdita – Lushnja                  3-0

(25-10, 25-11, 25-19)

Renditja

Nr.       Skuadra         N.        F.         H.        Pikë

1. Mirdita 1          1          0          3
2. Partizani 1          1          0          3
3. Teuta             1          0          1          0
4. Lushnja 1          0          1          0

Dita e dytë, 1 dhjetor 2018:

Lushnja – Teuta                    ora 15:00

Mirdita – Partizani                 ora 17:00

Dita e 3-të, 2 dhjetor 2018:

Partizani – Lushnja              ora 15:00

Teuta – Mirdita                       ora 17:00