ASNN – Supozohen të jenë prova të vlefshme stërvitore për të matur pulsin e skuadrave gjatë pushimit dimëror, por shpesh janë shndërruar në një mollë sherri, apo thënë shqip, në bela. Bëhet fjalë për ndeshjet miqësore dhe sikundër ka ndodhur shpesh në vitet, madje edhe në ndeshje zyrtare, janë skuadrat shqiptare ato që përfliten për trukime rezultatesh.

Rasti më i fundit është ai i mediave holandeze kanë publikuar ditën e djeshme një lajm sipas të cilit flitet për dyshimet që kanë hasur në lidhje me ndeshjet miqësore të klubeve të kampionatit holandez, të cilat ndodhen në Spanjë për fazën përgatitore. Mes ndeshjeve të përmendura, ato kanë hedhur dyshimin në takimin mes ADO Den Hagës dhe Skënderbeut, ndeshje kjo e zhvilluar më 7 janar, e mbyllur me rezultatin 2-0 në favor të holandezëve.

Ata i referohen një kompanie që merret me Sigurinë e Sportit ndërkombëtar dhe sipas kësaj kompanie, për këtë ndeshje ka dyshime për fiksim rezultati. Për një gjë të tillë kanë reaguar si klubi holandez ashtu edhe përfaqësues të Skëndërbeut, të cilët janë shprehur të befasuar nga ky lajm, pasi ky takim, sipas tyre, nuk ka patur as dyshimin më të vogël.

Gjithsesi, mediat holandeze jo vetëm kanë theksuar fluksin e lëvizjeve në baste për këtë ndeshje gjatë 90 minutave, por kanë shtuar se shpesh këto ndeshje miqësore që zhvillohen në faza të tilla përdoren për trukime. Skëndërbeu është skuadra e vetme shqiptare që po zhvillon fazën përgatitore në Spanjë dhe ka zhvilluar disa ndeshje të rëndësishme miqësore.

Korçarët i kanë humbur të gjitha këto ndeshje, 0-5 me Klyb Bryzh, 0-2 me ADO Den Hagën dhe 0-4 me Ostenden. Edhe për ndeshjen e parë me belgët u fol për trukim rezultati, por gjithçka mbeti në kuadër të spekulimit mediatik, ndërsa në rastin e holandezëve, akuzat janë më të forta. Nesër, Skëndërbeu do të luajë miqësoren e fundit të programuar ndaj Frajburgut.