ASNN – Marko Xhampaolo nuk do të largohet, të paktën për momentin. Klubi kuqezi, nëpërmjet Maldinit, ka konfirmuar sërish trajnerin, por është e qartë se kusht mbetet ndryshimi, rezultatet e nuk ka më kohë për hapa false. Duke filluar nga të shtunën, në Gjenovë kundër skuadrës së këtij qyteti, aty ku ish-trajneri i Sampdorias do të luajë pjesën kryesore të të ardhmes së tij në drejtim të kuqezinjve.
Logjikisht, në këtë situatë, po qarkullojnë emrat e mundshëm për ta zëvendësuar. Luçiano Spaleti duket i favorizuar, por bisedime ka patur edhe me Klaudio Ranierin që në të kaluarën ka treguar se di t’ia dalë me skuadrat që ndodhen në vështirësi gjatë kampionatit. Në vëmendje është edhe mundësia tjetër, Rudi Garsia, profili i të cilit u pëlqen mjaft drejtuesve të Milanit.
Pastaj është edhe Andrij Shevçenko, por, për momentin, ardhja e tij duket e vështirë. Vërtet është miqësia me Paolo Maldinin, por ish-sulmuesi i kuqezinjve, duhet të braktisë fillimisht rolin e trajnerit të përfaqësues së Ukrainës, me të cilën po ecën mjaft mirë. Në listë janë edhe emrat e Alegrit dhe Vengerit. Ndërsa të gjithë janë në pritje të ndryshimit, Xhampaolo vazhdon stërvitjen me skuadrën me mbështetjen e klubit.
6 ndeshje janë shumë pak për të gjykuar një trajner, thonë Maldini e Bobani. Filozofi e drejtë për një projekt afatgjatë, por duhen edhe rezultatet dhe ndonjë ide loje. Gjëra të cilat, deri tani nuk janë parë. 6 pikë në 6 ndeshje janë një mesatare aspak e mirë, por ajo që shqetëson më shumë, është se në horizontin kuqezi, nuk duket asnjë e ardhme premtuese.
E mbi të gjitha kur vetë trajneri në konferencën për shtyp thotë për paraqitjen e lojtarëve: “Duken sikur nuk i kam stërvitur asnjëherë”. Një fjali kjo që të bën të reflektosh: Duket sikur diçka nuk shkon, e mbi të gjitha para syve të të gjithëve. E për këtë nuk mjaftojnë as fjalët e kapitenit Romanjoli: “Jemi me trajnerin deri në fund”. Duhet ta tregojnë në fushë këtë, sepse ky Milan agonistik dhe një humbje në Gjenovë mund të shkatërrojë gjithçka.
