ASNN – Milani dhe Interi nuk po arrijnë të marrin pikët maksimale në ndeshjet e fundit të kampionatit të Serisë A. Kuqezinjtë kanë lënë 12 pikë ndaj skuadrave të ashtuquajtura të vogla, ndërsa zikaltërit nuk kanë alternativat e duhura për të shkuar drejt golit. Kundër skuadrave të pjesës së fundit të tabelës së renditjes, Milani ka marrë 33 pikë ndaj 45 të mundshmeve. Vendimet e gjyqtarëve në ndeshjet me Specian, Napolin e Udinezen, në dëm të kuqezinjve, vlejnë të paktën -12 pikë. Përfshirë këtu edhe paraqitjet zhgënjyese të skuadrës së Piolit, pikërisht kundër skuadrave të ashtuquajtura të vogla, në të cilat Milani ka humbur rastin për të marrë pikët maksimale, me të cilat do të ishte i sigurt në krye të renditjes.
Në këtë sezon të Serisë A sasia e pikëve të nevojshme për të fituar titullin, është inferiore në krahasim me sezonin e kaluar. Në dy ndeshjet me Udinezen, Milani ka marrë dy barazime, si dhe dy humbjet në “San Siro” me Sasuolon e Specian. Pa harruar edhe gabimet e gjyqtarëve në ndeshjet me Specian, Napolin, Udinezen, etj. Me këtë bilanc negativ rezultatesh, e me një paraqitje aspak të mirë të futbollistëve në fushë, ku loja e të gjithëve le shumë për të dëshiruar, Milani përgatitet për derbin me Interin, në Kupën e Italisë. Tashmë për Milanin është e ndaluar të humbasë terren në këtë mënyrë, nëse objektivi i tyre është të fitojnë titullin “kampion”. E mbi të gjitha, futbollistët kuqezinj të kuptojnë rëndësinë e ndeshjeve.
Por edhe zikaltërit kanë anët e tyre negative. Kriza mund të jetë nga ana teknike, fizike por edhe psikologjike. Kjo e fundit është e vështirë për t’u përballuar. Sepse nuk ka stërvitje specifike për ta zgjidhur. Vetëm në fushë mund të zgjidhet, me gola, me lojë të mirë e me fitore. Interi është në kërkim të një sinjali pozitiv për të rigjetur rrugën drejt fitoreve. Por brenda krizës së zikaltërve janë në mënyrë të pashmangshme ata lojtarë që nuk janë të pazëvendësueshëm, por që në pjesën e parë të sezonit bënë diferencën, duke bërë gjithmonë mirë duke marrë peshën më të madhe të ndeshjeve.
Por kjo gjë solli bllokimin psikologjiko-fizik të lojtarëve të mëdhenj, duke vënë në vështirësi alternativat, të cilat paguajnë më shumë se të tjerët për momentin e keq të skuadrës. Dhe numrat janë të pamëshirshëm përsa i përket alternativave të zikaltërve. Duke nisur nga Darmian, Dimarko, Gagliardini e deri te ish-yjet Vidal e Sançez, dy lojtarët më të paguar për momentin nuk po munden të lenë asnjë shenjë. E pra Interi ka shumë nevojë për ta, për të qenë të sigurt në rrugën drejt titulliit. Në mëyrë të veantë për Aleksis Sançez, rendimenti i të cilit në shënimin e golave ka rënë nga një mesatare prej 6.50 në 5.41.
