ASNN – “Nuk ka vaksinë më të mirë për mbrojtjen e shëndetit se sa sporti”. Kështu ka deklaruar të enjten Presidenti i Republikës, Ilir Meta, pasi ka pritur në një takim Presidentin e Federatës Shqiptare të Futbollit, Armand Duka. Nga ana e tij, ky i fundit është shprehur pas këtij takimi “besimplotë se shumë shpejt do të kemi një përgjigje nga autoritetet shëndetësore të vendin për t’iu rikthyer sa më shpejt garës futbollistike në të gjitha nivelet”.

“Kënaqësi të prisja sot Presidentin e Federatës Shqiptare të Futbollit, Armand Duka, i cili më njohu me protokollin sanitar të përgatitur nga ekipi mjekësor i FSHF-së, sipas udhëzimeve të UEFA-s, për rifillimin e aktiviteteve futbollistike sa më parë të jetë e mundur”, – shkruan kreu i shtetit në një postim të shkurtër në profilin e tij në rrjetin social “Facebook”. – Besoj se me përpjekje dhe mirëkuptim, ashtu si edhe në shumë vende të tjera, edhe ne t’i rikthehemi në kushtet e reja dhe me protokollin e duhur sanitar, jetës futbollistike, por edhe sportive në vend.

“Nuk ka vaksinë më të mirë për mbrojtjen e shëndetit se sa sporti”, – ka përfunduar presidenti Meta. Ndërkohë, pas takimit, ka reaguar edhe kreu i organizmit që qeveris futbollin në vend. “Sot kisha kënaqësi të zhvilloja një takim me Presidentin e Republikës, Ilir Meta, të cilin e njoha me kërkesën e Federatës Shqiptare të Futbollit për rifillimin e futbollit”, – shkruan Duka në një postim në profilin e tij në rrjetin social “Facebook”.

“Në takimin me Presidentin prezantova dhe protokollin sanitar të përgatitur nga stafi jonë në konsultim me ekspertët e FIFA-s, UEFA-s dhe disa federatave homologe, – ka vijuar ai. – Mbetem besimplotë se shumë shpejt do të kemi një përgjigje nga autoritetet shëndetësore të vendin për t’iu rikthyer sa më shpejt garës futbollistike në të gjitha nivelet. Futbolli si sporti më i dashur për të gjithë shqiptarët do të shërbejë shumë për rikthimin e jetës sonë në mënyrë graduale drejt normalitetit.”