ASNN – 7 fitoret radhazi të Arsenalit e kanë çuar skuadrën e Arsen Vengerit pas Mançester Sitit, duke ushtruar presion të vazhdueshëm edhe ndaj Çellsit në garën për titullin “kampion”. Francezi u shpall trajneri i muajit mars, çmim të cilin e mori për të 14-tën herë në karrierë. Por cilat janë arsyet e kësaj forme pozitive që po kalojnë “Topçinjtë”.
Kthimi i Ëzillit, golat e Zhirudit dhe siguria e Kokëlënit, duket se janë armët e fshehta të Arsenalit. 14 gola në sezonin aktual e bëjnë Zhirudit një hero në Stadiumin “Emirejts”, pasi francezi nuk është vlerësuar asnjëherë për potencialin që zotëron. Herri Kejn, Diego Kosta, Serxhio Aguero & Çarlie Ostin kanë shënuar më shumë se ai por mesatarja e minutave për gol i përket sulmuesit francez nga veriu i Londrës.
Gjithashtu loja e tij në ndihmë të skuadrës e kanë shndërruar në profilik pozicionin e tij. Natyra luftarake e Kokëlënit ndihmoi Arsenalin të fitonte ndeshjen e 11-të nga 13 që mesfushori francezi ka nisur si titullar këtë sezon. Me 35 duele të fituara e 33 topa të rrëmbyer ai lë pas eksperiencën e dyshes Arteta-Flamini që duket se janë në fundin e karrierës tek “Topçinjtë”.
Edhe ndaj Liverpulit, Kokëlëni ishte më i miri në llojin e tij me 4 duele të fituara e 6 topa të rrëmbyer. Diçka që ndihmon shumë edhe lojën e të riut Belerin, si një tjetër surprizë pozitive. Në fund kthimi i të dëmtuarve nga infermieria është gjithnjë diçka pozitive për një skuadër. Por tek Arsenal kjo ndjehet sidomos me kthimin e Ëzillit, me gjermanin në formacion “Topçinjtë” kanë fituar 11 nga 13 të fundit në të gjitha veprimtaritë.
Edhe Liverpul u rinjoh me klasin e gjermanit, i cili ka një gjuhë të veçantë trupi kur zbret në fushë. Loja e kampionit gjerman të botës e lehtëson më shumë gjetjen e golit nga Zhirudit dhe ekuilibron më së miri lojën e Kokëlënit dhe Belerinit. Në këto kushte Arsenal ndan në mes dy skuadrat e Mançesterit në Premier Ligë dhe është edhe në gjysmëfinalet e Kupës së Anglisë (FA Cup).
