ASNN – A kanë fund rekordet e këtij njeriu?! Mesi vetëm 6 fitore larg rekordit të Iker Kasijasit. Kampionati spanjoll është një nga më të fortët e më të bukurit në botë. Kjo vjen ngaqë në këtë kampionat luajnë disa prej yjeve më të mëdhenj të futbollit. E një ndër ta është Lionel Mesi, argjentinasi trupvogël i Barcelonës, që ka magjepsur sportdashësit anekënd botës me lojërat dhe golat e tij. Mesi është momentalisht golashënuesi më i mirë në Evropë, me 19 gola në po aq takime të luajtura.
Duke lënë pas fenomenin e Paris SG-së, Kilian Mbape, që ka realizuar 17 gola, si dhe rivalin e tij të përjetshëm, Kristiano Ronaldon, me 15 gola. Por Mesi ka në objektivin e tij në këtë pjesë të dytë të sezonit të arrijë një tjetër rekord, atë të lojtarit që ka shënuar më shumë fitore në historinë e kampionatit spanjoll. Rekordin e mbajnë dy portierë, njëri i Realit e tjetri i Barcelonës. I pari Iker Kasijas me 334 fitore, kurse i dyti është Anton Zubizarreta me 333 fitore.
Në suksesin e fundit ndaj Hironës në javën e 21-të të La Ligës, Mesi regjistroi fitoren e 328-të në karrierë në kampionatin spanjoll, duke lënë prapa ish-sulmuesin e madh të Realit të Madridit, Raul Gonzales, i cili kishte regjistruar 327 fitore në kampionatin e vendit iberik. Padyshim, për Mesin ishte një sukses i madh dhe tani ai është vetëm 6 fitore larg rekordit të Iker Kasijasit. Me paraqitjet e Barcelonës, pretendimet e saj dhe vetë formën e Mesit, mund të besohet se brenda dy muajve ai do ta kapë edhe këtë rekord, për t’u bërë futbollisti me më shumë fitore në historinë e kampionatit spanjoll.
Thuajse të gjitha rekordet e tjera ai i ka thyer. Një tjetër rekord që mund të regjistrojë në fund të sezonit është ai i golashënuesit me më shumë “Këpuca të Arta” në Spanjë, një çmim që e mban Telmo Zarra i Atletikos së Bilbaos, që e ka fituar 6 herë trofeun e golashënuesit më të mirë, ndërsa Mesi e ka fituar 5 herë deri tani. Nëse ia del këtë sezon, atëherë ai thyen edhe këtë rekord e bëhet unikal në historinë e Barcelonës, të La Ligas e ndoshta dhe në botë.
