ASNN – Ndeshja e javës së 14-të të kategorisë superiore, ajo midis Teutës dhe Tiranës është mbyllur në barazim 0-0. Megjithë përpjekjet e të dyja skuadrave, rrjetat mbetën të paprekura.

Kjo ndeshje u përcoll për teleshikuesit drejtpërdrejt nga Rrjeti i Radio-Televizionit Shqiptar. Në ndeshjen tjetër të javës së 14-të, Skënderbeu ka fituar 4-0 me Bylisin dhe ruan pozitat në vendin e dytë në renditje.

Java e 14-të e Kategorisë Superiore e ka ngritur siparin të mërkurën, me takimin midis Laçit dhe Vllaznisë, që është fituar nga vendasit me rezultatin 2-0 dhe atë midis Flamurtarit dhe Kukësit, që është fituar nga miqtë me një gol të vetëm.

Të dy këto takime u luajtën duke nisur nga ora 14:00, ndërsa në takimin e orës 17:00, që u luajt në Stadiumin Kombëtar “Qemal Stafa” në kryeqytet, Partizani ka shpartalluar Tërbunin me rezultatin 4-0.

Renditjen e Kategorisë Superiore e kryeson Partizani, me 38 pikë, 4 më tepër sesa ndjekësja më e afërt dhe kampionia në fuqi, Skënderbeu, ndërsa Teuta mban vendin e 3-të, me 27 pikë, 4 më tepër sesa Kukësi i vendit të 4-t dhe 6 më tepër sesa Tirana e vendit të 5-të.