ASNN – Me ndeshjet e javës së 21-të, Kampionati Kombëtar i Basketbollit për Femra ka ulur siparin e sezonit të rregullt, për t’ia lënë vendin fazës së “play-off”-it për titullin “kampion”, ku janë përcaktuar edhe çiftet gjysmëfinaliste, që janë Flamurtari-Vllaznia dhe Goga Basket-Tirana. 3 takimet e këtyre gjysmëfinaleve luhen më 10, 13 dhe 17 maj 2016, kjo e fundit nëse do të jetë e nevojshme.

Ndërkohë, në ndeshjet e javës së 21-të, Goga Basket ka dhënë sinjale të forta rivaliteti për titullin “kampion”, teksa dje në Vlorë, pikërisht në javën e fundit të fazës së tretë, ka mundur Flamurtarin, me rezultatin 67-54. Në 21 ndeshje të këtij sezoni të rregullt, kjo është humbja e parë për vlonjatet, të cilat janë njëkohësisht kampione në fuqi të basketbollit shqiptar.

Ndërkohë, Tirana i ka ruajtur titullaret e saj në ndeshjen e fundit, atë me Elbasanin, ndërsa skuadrën e vendit të fundit në basketboll për femra e ka mundur thuajse me rezervat. Përsëri shkëlqen Eliverta Bujari, e cila realizon 31 pikë nga 95 të bardhebluve, ndërsa nga arsenali i saj dalin dhe 5 trepikësha. Por më pas është ulur në stol, Superkupa të mërkurën është e rëndësishme.

Kurse për Vllazninë e koshit të femrave, ndeshja e javës së fundit të kampionatit me Kamza Basket, takim i luajtur mesditen e së shtunës në pallatin e sportit “Qazim Dervishi” të Shkodrës dhe e fituar nga vendaset 88-52, ka qenë si një tip “nxemje”, pasi gati 10 ditë më pas basketbollistet kuqeblu, do të nisin ndeshjet e fazës së “play-off”-it, ku në gjysmëfinale do të përballen me Flamurtarin.

Dhe, së fundi, Skënderbeu e ka mbyllur me humbje sezonin 2015-2016, teksa dje, në javën e fundit, nuk ka arritur të mposhtë në shtëpi as Studentin, pasi është mundur 65-68. Me këtë fitore, kryeqytetaset e drejtuar nga trajnerja veterane, Fiorentina Mitku, e mbyllin këtë sezon në vendin e 5-të, me 28 pikë, ndërkohë që Skënderbeu e mbyll në vendin e parafundit me 27 pikë.

Kampionati Kombëtar

i Basketbollit – Femra

Java e 21-të

(30 prill 2016)

Flamurtari – Goga Basket               54-67

Tirana – Elbasani                            95-79

Vllaznia – Kamza Basket               88-52

Skënderbeu – Studenti                  65-68

Renditja

Nr.       Skuadra                     N.        F.         H.        Psh-Pp           Pikë

1. Flamurtari                  21        20          1        1615-1282     41
2. Goga Basket             21        17          4        1796-1318     38
3. Tirana                         21        14          7        1577-1480     34
4. Vllaznia                     21        12          9        1504-1425     33
5. Studenti                     21          7        14        1209-1468     28
6. Kamza Basket          21          6        15        1150-1320     27
7. Skënderbeu              21          6        15        1320-1525     27
8. Elbasani                    21          2        19        1350-1639     22

Faza e “play-off”-it

për titullin “kampion”

Gjysmëfinalet:

Flamurtari – Vllaznia

Goga Basket – Tirana

Shënim: 3 takimet luhen më 10, 13 dhe 17 maj 2016, kjo e fundit nëse do të jetë e nevojshme