ASNN – Fitore e madhe ndaj Partizanit, Vllaznia shpëton nga rënia. Mbyllet sezoni i rregullt në nivelit më të lartë të basketbollit të meshkujve, që uli të shtunën siparin e tij me ndeshjet e javës së 20-të. Vllaznia ja del në javën e fundit dhe i shpëton rënies nga kategoria falë fitores së arritur në kryeqytet ndaj Partizanit duke përfituar nga humbja  Kamzës ndaj Goga Basket. Do të jetë Kamza Basket ekipi që zbret në kategorinë e dytë, ndërsa shkodranët do të ndeshen në “play-out” ndaj kryeqytetasve të Invejdërs.

Ndërkohë, në takimin tjetër, Teuta fitoi përballë Tiranës. Në fazën play-off ndërkohë, do të luajnë Goga Basket, Teuta, Partizani dhe Tirana. Kështu, është dashur java e 20-të e dhe e fundit e Superligës në basketboll për meshkuj për të zgjidhur enigmën dhe është Vllaznia do të luajë edhe sezonin e ardhshëm mes skuadrave më të mira. Të paktën për momentin, pasi shkodranët kanë ende edhe dy ndeshjet e “play-out”-it ndaj Invejdërs, skuadrës së renditur e dyta në Kategorinë e Parë.

Ndërkohë që, në Kategorinë e Parë do të zbresë skuadra e Kamza Basket, e cila do t’i lërë vendin Barleti Eagles. Vllaznia ka arritur një fitore të vuajtur ndaj Partizanit në “Asllan Rusi” me shifrat 89-86, ndeshje ku të dyja ekipet rivalizuan fort. Miqtë nga Shkodra patën një epërsi të lehtë në shumicën e kohës, por në fund rrezikuan shumë. Partizani, i kualifikuar prej kohësh në play off, tentoi në fund të përmbysë shifrat, por pa sukses.

Vllaznia luajti me më shumë dëshirë për fitore, duke u mbrojtur mirë dhe fitoi me meritë. Në ndeshjet e tjera, Goga Basket nuk ka pranuar të bëhet pjesë e “allishverisheve” të fundsezonit, teksa e mundi Kamza Basketin 104-93, në një takim që ishte më së shumti një stërvitje për durrsakët, por i zbriti nga kategoria periferikët e kryeqytetit. Ndeshje ku ekipet luajtën hapur, çka shihet te pikët e shumta të realizuara. Por humbja ishte fatale për Kamza Basket.

E cila, pikërisht në javën e fundit të sezonit të rregullt zbret në vendin e fundit në renditje dhe bie nga kategoria. Ndërkaq, në Sallën Sportive “Fahrie Hoti” në kryeqytet, skuadra e Teutës ka fituar 83-70 ndaj Tiranës, një ndeshje pa shumë nerv dhe emocione. Të dyja ekipet e kanë siguruar kualifikimin në “play-off”, ndaj më së shumti ruajtën forcat, duke u përgatitur për përballjen që do të zhvillojnë në mesjave mes tyre, në finalen e Superkupës.

Kampionati Kombëtar

i Basketbollit – Meshkuj

Superliga

Java e 20-të

(13 prill 2019)

Goga Basket – Kamza Basket        104-93

Partizani – Vllaznia                            86-89

Tirana – Teuta                                     70-83

Renditja

Nr.       Skuadra                     N.        F.         H.        Pikë

1. Goga Basket             20        18          2        38
2. Teuta                          20        15          5        35
3. Partizani                    20        10        10        30
4. Tirana                         20          8        12        27
5. Vllaznia                     20          5        15        25
6. Kamza Basket          20          4        16        24