ASNN – Në fundjavë është mbyllur java e 7-të e Kampionatit Kombëtar të Femrave, me katër ndeshje që janë luajtur ditën e shtunë dhe Kinostudio-Partizani e Vllaznia-Teuta, që u luajtën të dielën. Në të dyja sfidat kanë triumfuar skuadrat vendase, respektivisht 6-2 dhe 8-0. Të shtunën Tirana AS që mban vendin e tretë në renditje triumfoi në Korçë ndaj Skëndërbeut 5-1 falë 3-golëshit së Jehona Çokajt dhe dygolëshit të Trokës.

Për vajzat korçare shënoi Repa që ngushtoi përkohësisht rezultatin në 1-2, por më pas nuk mundën të ndalin dot skuadrën e Petrit Haxhiajt që shënoi edhe 3 gola të tjerë. Tirana priste në shtëpi Juban Danjën në një duel të fortë që pa triumfuese vajzat bardheblu, me rezultatin 5-3. Tirana e fillon në sulm dhe gjen golin e parë në minutën e 16-të me Vishkullin. Stafetën e merr më pas Kesjana Goro që shënon 3 gola rradhazi në minutat 25, 60 dhe 62.

Kur gjithçka dukej e sigurtë reagon Juban Danja që shënon 3 gola me anë të Cakës, në të 71-tën, dhe Selimit në minutat 71 dhe 73. Për të vulosur rezultatin final 5-3 mendon Vishkulli në minutën e 88-të, duke regjistruar dhe dygolëshin vetjak. Ndërkaq, në stadiumin “Roza Haxhiu” të qytetit të Lushnjes, vendaset prisnin Bilisht Sportin, me të dy skuadrat që ndodheshin në kuotën e zero pikëve. Lagunaret arritën fitoren e parë në histori në kampionatin e femrave ku marrin pjesë për herë të parë.

Ndeshja u mbyll me fitoren 2-0 falë golave të Nexhës në minutën e 51-të dhe S. Nexhës në minutën e 78-të. Bilisht Sport duhet të presë ende për të marrë pikët e para në këtë kampionat. Vllaznia kryeson kampionatin me 21 pikë pas 7 javëve të para. Apolonia renditet në vendin e dytë, vetëm 3 pikë larg. Tirana AS dhe Tirana ndajnë vendet 3 dhe 4 në kuotën e 16 pikëve. Me 15 pikë, Juban Danja renditet e 5-ta, vetëm 3 pikë përpara Kinostudios së vendit të gjashtë.

Partizani renditet në vendin e 7-të me 9 pikë të grumbulluara po aq sa ka edhe Akademia AAS.  Skënderbeu, Teuta dhe Lushnja në kuotën e 3 pikëve në renditjen e përgjithshme e cila mbyllet me Bilisht Sportin në kuotën e 0 pikëve.

Kampionati Kombëtar

i Futbollit – Femra

Java e 7-të:

Të shtunën, 9 janar 2021:

Lushnja – Bilisht Sport                      2-0

Tirana – Juban Danja                        5-3

Skënderbeu – Tirana AS                   1-5

Apolonia – Akademia AAS             14-0

Të dielën, 10 janar 2021:

Kinostudio – Partizani                       6-2

Vllaznia – Teuta                                  8-0

Renditja

Nr.       Skuadra                     Pikë

1. Vllaznia                     21
2. Apolonia                    18
3. Tirana AS                  16
4. Tirana                         16
5. Juban Danja             15
6. Kinostudio                 12
7. Partizani                      9
8. Akademia AAS           9
9. Teuta                            3
10. Skëndërbeu   3
11. Lushnja   3
12. Bilisht Sport   0