ASNN – Është luajtur java e pestë e Kampionatit Kombëtar të Futsallës, që organizohet nga Federata Shqiptare e Futbollit (FSHF). Ndeshja e parë e kësaj jave ishte Partizani-Flamurtari, që u zhvillua në Arenën Sportive “Goga Basket”. Të kuqtë hodhën pas momentin negativ dhe u rikthyen te fitorja, pasi triumfuan 11-5 ndaj Flamurtarit.

Takimi nisi më mirë për vlonjatët që zhbllokuan sfidën që në minutën e dytë, megjithatë Partizani gjeti forcë të reagonte dhe realizoi 6 gola që në pjesën e parë.  Pjesa e dytë nuk pati shumë histori me Partizanin që e mbizotëroi ndeshjen dhe në fund triumfoi me rezultatin e thellë 11-5.

Takimi tjetër i javës ishte mes Vllaznisë dhe Tiranës që u luajt në pallatin e sportit “Qazim Dervishi”. Bardheblutë triumfuan sërish pasi mundën Vllazninë 8-3. Tirana e mbizotëroi takimin dhe realizoi 3 gola që ne pjesën e parë, ndërsa në atë të dytën, bardheblutë shënuan edhe 5 gola të tjerë.

Në anën tjetër, kuqeblutë realizuan 3 gola në pjesën e dytë dhe sfida në fund përfundoi 3-8 në favor të Tiranës. Këtë sezon bardheblutë nuk njohin kufi duke regjistruar 5 fitore në po aq sfida dhe udhëheqin renditjen me 15 pikë, 8 më shumë se Partizani i vendit të dytë.

Në javën e gjashtë të Kampionatit Kombëtar të Futsallës, Tirana do të përballet në derbi me Partizanin, ndërsa Flamurtari me Vllazninë.

Kampionati Kombëtar

i Futbollit të Sallës

Java e 5-të:

Partizani – Flamurtari           11-5

Vllaznia – Tirana                     3-8

Renditja:

Nr.       Skuadra         Pikë

1. Tirana             15
2. Partizani          7
3. Flamurtari        4
4. Vllaznia           2

Java e 6-të:

Tirana – Partizani

Flamurtari – Vllaznia