ASNN – Të mërkurën pasdreke është luajtur ndeshja e 4-t e javës së 18-të të Kategorisë Superiore dhe përballja midis Luftëtarit dhe Kukësit, e luajtur në Gjirokastër është mbyllur me rezultatin 0-0. Në pjesën e parë, me një vendim të diskutueshëm, Luftëtarit iu anulua edhe një gol. Takimi i fundit i kësaj jave është luajtur në mbrëmje dhe Tirana ka mposhtur në sekondat e fundit Bylisin, duke fituar 2-1 në kryeqytet.
Në fakt, ka qenë një përpjekje e fundit e shtatlartit Majkëll Ngo’o, i cili, në rrëmujë e sipër, në vijën fatale, ia ka dalë ta shtyjë topin në rrjetën e ballshiotëve. 3 ndeshjet e para të kësaj jave janë luajtur të martën dhe, pasdreke, në takimin e parë të Superiores për 2020-ën, Vllaznia ka mposhtur në fushën e vet Flamurtarin, me rezultatin 2-0, me nga një gol të shënuar për secilën pjesë loje.
Ndërkohë, në mbrëmje, Laçi ia ka dalë ta mundë Teutën në Durrës me një gol të vetëm, duke korrur fitoren e 8-të të këtij sezoni. Kurse në Korçë, Skënderbeu ka shtangur kampionen në fuqi, Partizanin, duke e mundur me shifrat 3-2, në takimin që ka parë të kuqtë kryeqytetas të luajnë me 10 lojtarë për disa minuta të fundit të pjesës së parë dhe gjithë pjesën e dytë.
Por skuadra e trajnerit italian, Adolfo Sormani, i cili debutoi kështu me një humbje në këtë rikthim të tij në stolin e të kuqve kryeqytetas, pati edhe dy 11-metërsh të dhënë në favor të saj, njërin prej të cilëve e shpërdoroi. Kështu, pas ndeshjeve të javës së 18-të, Kukësi ruan kreun, në kuotën e 32 pikëve, një më tepër sesa Tirana dhe dy më tepër sesa Bylisi. Laçi, Partizani dhe Teuta, kanë nga 28 pikë secila.
