ASNN – Janë luajtur sot të 5 takimet e javës së 18-të të Kategorisë së Parë të Kampionatit Kombëtar të Futbollit, që ishte edhe java e fundit e fazës së dytë dhe në bazë të renditjes së të cilës do të përcaktohet edhe kalendari i fazës së 3-të. Mbi bazën e formulës së adoptuar nga Federata Shqiptare e Futbollit, në këtë fazë të tretë favorizohen skuadrat e gjysmës së sipërme të renditjes, të cilat 5 nga 9 ndeshjet e kësaj pjese të 3-të të kampionatit do t’i luajnë në fushën e tyre dhe vetëm 4 në fushë të huaj, ndryshe nga ato të gjysmës së poshtme, që do të luajnë më shumë jashtë fushe.

Në atë që ishte takimi më i rëndësishëm i kësaj jave, Besëlidhja ka fituar minimalisht në Mamurras ndaj skuadrës vendase, falë një goli të Hoxhës në pjesën e parë, duke konfirmuar ambiciet për t’u ngjitur në Kategorinë Superiore. Lezhjanët kanë kapërcyer tashmë në renditje mbi mamurrzakët, në kuotën e 44 pikëve, dy më pak sesa Tërbuni kryesues, që fitoi 2-1 në Krujë ndaj Kastriotit vendas, me golat e Grecës dhe Lekajt. Mamurrasi zbret në vendin e 3-të, në kuotën e 42 pikëve, por mbetet sidoqoftë në valle për t’u ngjitur në Kategorinë Superiore sezonin e ardhshëm.

Në takimet e tjera të kësaj jave, Iliria e Fushë-Krujës ka arritur një fitore 3-2 në fushën e vet ndaj Burrelit, duke iu bashkuar matjanëve në gjysmën e sipërme të renditjes në përfundim të fazës së dytë. Në gjysmën e poshtme mbetet Kamza, që fitoi “in-extremis”, në fushën e vet ndaj Adës së Velipojës, falë një 11-metërshi të Kolecit në minutën e 5-të shtesë së ndeshjes, si dhe Besa, që zhgënjeu në fushën e vet, duke mos shkuar dot më larg se një barazim 2-2 me Veleçikun e Koplikut, që mban vendin e fundit. Kalendari i fazës së 3-të pritet të zyrtarizohet brenda dy-tre ditëve të ardhshme.

Kategoria e Parë

Grupi A

Java e 18-të

(7 mars 2015)

Kastrioti – Tërbuni                                        1-2

Shënues: Hoxha 33’ / Greca 27’, Leka 38’

Besa – Veleçiku                                            2-2

Shënues: Hasa 7’ Bajaziti 9’ / Pepa 42’, 90’

Kamza – Ada Velipojë                                  1-0

Shënues: Koleci 90’+5(11-m.)

Iliria Fushë-Krujë – Burreli                          3-2

Shënues: Baku 34’(11-m.) Goxhaj 43’,

Ajazi 84’ / Pirani 87’(11-m.), 90’

Mamurrasi – Besëlidhja                               0-1

Shënues: Hoxha 32’

Renditja

Nr.       Skuadra                     N.        F.         B.        H.        Gsh-Gp          Pikë

1. Tërbuni 18        14        4          0        33-9                46
2. Besëlidhja 18        14        2          2        36-8                44
3. Mamurrasi 18        13        3          2        32-9                42
4. Burreli 18        7        1          10        22-27              22
5. Iliria Fushë-Krujë 18        5        5          8        15-19              20
6. Kamza 18        5        4          9        14-27              19
7. Besa 18        3        8          7        18-25              17
8. Kastrioti 18        4        4          10        19-26              16
9. Ada Velipojë 18        4        3          11        19-36              15

10        Veleçiku Koplik        18        3        2          13        16-38              8