ASNN – Vllaznia dhe Tirana janë ndarë në barazim 1-1 në derbin e javës së 8-të të kampionatit të Kategorisë Superiore të Kampionatit Kombëtar të Futbollit. Smajli për Tiranën dhe Arbri për Vllazninë janë autorët e golave që i dhuruan skuadrave të tyre nga një pikë në renditje. Kjo ndeshje u përcoll për teleshikuesit drejtpërdrejt nga Rrjeti i Radio-Televizionit Shqiptar. Kështu, Stadiumi “Ismail Xhemali” I Pukës ka mikpritur ndeshjen Vllaznia-Tirana, të vlefshme për javën e 8-të të Kategorisë Superiore.
Dy skuadra me histori në futbollin shqiptar, Vllaznia dhe Tirana kanë dhuruar një ndeshje të mirë përballë tifozëve përkatës. Në pjesën e parë është Tirana më kërkuese ndaj golit dhe është Zhilberto Fortunat, që humbet rastin më të mirë për të kaluar skuadrën e tij në epërsi në minutën e 26-të. Dy minuta më pas, është Fukui që gjuan bukur brenda zonës, por grushton portigeri Dragojeviç i Vllaznisë. Në 39-ën, Smajli godet saktë me kokë brenda zonës, pas një topi të ardhur nga goditja e këndit dhe Tirana kalon në epërsi.
Me fitoren 1-0 të bardhebluve mbyllen 45 minutat e para. Pjesa e dytë nis me një rast për Tiranën, kur, në minutën e 56-të, Gilman Lika shpërdoron një rast të pastër për të dyfishuar rezultatin, por gjuajtjen e sulmuesit shkodran e pengon në finalizim Marku. Në minutat e mbetura është Vllaznia më kërkuese ndaj golit. Souza përpiqet me një goditje me kokë në minutën e 71-të, por pret portieri Edvan Bakaj.
Në të 72-ën minutë, Krymi gjuan fluturimthi brenda zonës, por topi godet shtyllën pingule të mbrojtur nga Bakaj. I njëjti futbollist humbet një tjetër rast për të barazuar rezultatin në minutën e 83-të, kur i vetëm brenda zonës së Tiranës, gjuan jashtë. Minuta e 85-të dhe gjyqtari jep goditje dënimi për Vllazninë. Në largësinë rreth 16 metra, Polizoi Arbri gjuan saktë dhe barazim 1-1. Tirana përpiqet të shënojë në minutën e 3-të shtesë, me anë të Fukujit por topi përfundon jashtë.
Në ndeshjet e tjera u arritën këto rezultate: Kukësi ka fituar 1-0 me Tërbunin ndërsa Flamurtari-Bylis është mbyllur në barazim pa gola 0-0. Java e 8-të e Kategorisë Superiore mbyllet në mbrëmje me supersfidën e orës 19:00, atë midis Partizanit dhe Skënderbeut. Të dyja skuadrat vijnë në këtë përballje me 19 pikë të barabarta dhe si kryesuese të kampionatit. Ndeshja pritet të jetë të fortë, pasi luajnë dy ekipet më të mira të vendit, futbollistët e të cilëve gëzojnë një formë të mirë sportive.
