ASNN – Do të jetë një duel midis Kukësit dhe Laçit finalja e madhe e Kupës së Shqipërisë, pasi dy skuadrat triumfuan në duelet e tyre gjysmëfinale, përkatësisht ndaj Skënderbeut dhe Tiranës. Në ndeshjet e kthimit, që u luajtën sot, laçjanët kanë triumfuar me një gol të vetëm në fushën e tyre përballë Tiranës, ndërkohë që ndeshja e para dy javëve ishte mbyllur me rrjeta të paprekura.

Goli për kurbinasit u shënua nga nigeriani Xhejms, pas një ore lojë, ndërsa bardheblutë kryeqytetas e luajtën shumicën e lojës me 10 lojtarë pas ndëshkimit me karton të kuq të Ndi-kumanës. Ndërkohë, në Korçë, Kukësi e ka shfrytëzuar më së miri atë fitore minimale të arritur në ndeshjen e parë në fushën e vet, duke marrë një barazim 1-1 ndaj Skënderbeut dhe duke u kualifikuar për në finale.

Korçarët kanë kaluar të parët në epërsi, me anë të Prognit, i cili realizoi pas një çerek ore lojë, por 9 minuta më pas, është i përhershmi Pejiç ai që finalizon bukur një kundërsulm të kukësianëve dhe barazon shifrat. Në barazim 1-1 do të mbyllet pjesa e parë, ndërsa pjesa e dytë nuk do të sjellë gola të tjerë dhe Kukësi siguron vendin në finale, ku përballë do të ketë Laçin.

Kupa e Shqipërisë

Gjysmëfinalet:

Ndeshjet e kthimit:

(22 prill 2015)

Të mërkurën:

Laçi – Tirana                         1-0                  (0-0)

Shënues: Xhejms 61’

Stadiumi i Laçit

Skënderbeu – Kukësi         1-1                  (0-1)

Shënues: Progni 15’ / Pejiç 24’

Stadiumi “Skënderbeu”, Korçë

Finalja:

(30 maj 2015)

Kukësi – Laçi