ASNN – Futbollisti i kurbinasve, në një rrëfim të sinqertë për veten dhe karrierën në “Rubrikën Sportive” në RTSH. Një shans që iu dha për të rinisur karrierën dhe një mundësi që duhej shpërblyer në të njëjtën mënyrë. Kështu e ka cilësuar Mentor Mazrekaj këtë sezon të tij tek Laçi, me të cilin ka rinovuar edhe për dy vjet të tjera.
“Kur erdha te Laçi e mora si sfidë, sepse e kisha të vështirë të gjeja skuadër, ndërsa tani më duan shumë skuadra, – ka thënë ai. – Por nuk mund të harroj skuadrën që më zgjati dorën dhe i jam mirënjohës presidentit Laska. Prandaj edhe kam rinovuar për dy vite me Laçin.”
Në një rrëfim të sinqertë në studion e Rubrikës Sportive në RTSH, 32-vjeçari ka këmbëngulur se ai është bërë shpesh, pa të drejtë, “kokë turku”. “Konstatimet për temperamentin tim? Ishin dhe të ekzagjeruara, sepse të gjithë dalin pas një ndeshja, vetëm unë përfundoja në faqet e para të gazetave”, – ka këmbëngulur ai.
Megjithatë, ai ka pohuar edhe të metat e tij, sidomos në drejtim të disiplinës. “Te Partizani, vitin më të mirë e kam me trajnerin Duro, – ka thënë futbollisti nga Kosova. – Por edhe me trajnerët e tjerë shqiptarë kam kaluar mirë. Me trajnerët e huaj nuk kam patur marëdhënie të mira, por nuk u vë faj se ata duan disiplinë.”
“E unë po të kisha qenë i disiplinuar nuk do të isha këtu”, – shtoi Mazrekaj, i cili ka folur edhe për kundërshtarin e radhës, Kastriotin, që u mund në fundjavë 0-3 përballë ish-skuadrës së tij, Partizanit. “Nuk e prisja një fitore kaq të lehtë ndaj Kastriotit, por dihet që të kuqtë janë një nga skuadrat më të mira të kampionatit”, – tha ai.
“Uroj që edhe ndaj nesh, Kastrioti të jetë po kaq dobët”, – ka ironuar futbollisti i kurbinasve. Në fakt, mesfushori i sheh të dy skuadrat e tij favorite për ta sfiduar Vllazninë për titullin. “Vllazninë kanë filluar ta marrin më seriozisht, prandaj ata kanë më shumë vështirësi tani, sepse kundërshtarët mbrohen më shumë”.
“Gara për titull? Kam dashuri për të dyja skuadrat, – ka vijuar ai. – Por, atje tek Partizani kam luajtur për shumë vite. Tani, jam te Laçi. Pretendenti për titull mes të dyve do të vendoset nga ndeshjet direkte, e mendoj 50 me 50”. Tirana dhe Kukësi? Nuk i shikoj për titull, por mund të hapin problem, sepse kanë shumë cilësi.”
