ASNN – Niveli më i lartë i Kampionatit Botëror të Motoçiklizmit, që njihet ndryshe si Moto GP, ka kurorëzuar sot, 3 gara para fundit, kampionin e këtij sezoni, i cili është spanjolli Mark Markez. Festa e parakohshme e spanjollit erdhi të dielën edhe falë fatit, pasi dy rivalët e tij kryesorë, bashkëatdhetari Lorenco dhe italiani Rosi, pësuan aksidente dhe e mbyllën garën pa pikë. Sikundër i gjithë ky sezon, edhe emocionet e garës së sotme u sollën për sportdashësit drejtpërdrejt nga Rrjeti i Radio-Televizionit Shqiptar.
Mark Markez është shpallur, për të 3-ën herë në këto 4 sezonet e fundit, kampion i botës në Moto GP pasi ka mbërritur i pari në finishin e garës së Çmimit të Madh të Japonisë. Kjo garë, që u zhvillua sot në mëngjes me orën e Tiranës, e pa spanjollin të merrte vendin e parë në pistën e Montegit, duke lënë prapa më tepër se 2 sekonda Andrea Doviciozon e “Dukati”-t, ndërsa dy ndjekësit e tij më të afërt, Valentino Rosi dhe Horhe Lorenco të “Jamaha”-s nuk e mbyllën dot garën.
Tanimë Markez është i parritshëm edhe matematikisht në vendin e parë me 273 pikë, teksa ndjekësi më i afërt, Rosi, ka 196 pikë, ndërsa Lorenco 182. Megjithatë, festa e parakohshme e spanjollit erdhi të dielën edhe falë fatit, pasi dy rivalët e tij kryesorë, bashkëatdhetari Lorenco dhe italiani Rosi, pësuan aksidente dhe e mbyllën garën pa pikë. Në një fillim të mbushur me dramë, me parakalime të njëpasnjëshme dhe me kryesimin që ndërroi shpesh duar, ai që përfundoi në zhavorr ishte Rosi.
Ndërkohë, Lorenco, i cili mbeti shpresa e vetme që mund t’i mohonte Markezit titullin, u rrëzuar pak xhiro nga fundi, duke i dhënë kështu mundësinë bashkëatdhetarit të tij të garonte i pashqetësuar në krye, duke marrë kështu fitoren e 5-të në këtë sezon dhe duke siguruar njëkohësisht titullin e 3-të “kampion” në këto 4 sezone të fundit të Moto GP.
