Shoqata italiane kulturore sportive merr përsipër zhvillimin e veprimtarisë në Durrës. Maratona Egnatia, e cila do të zhvillohet më 28 nëntor në Durrës, do të jetë një veprimtari mes sportit dhe historisë. Shoqata italiane kulturore-sportive ka marrë përsipër zhvillimin e kësaj maratone, ndërsa në Shqipëri është krijuar dhe Shoqata e Rrugës “Egnatia”, me president ish-kryeministrin e Shqipërisë, Aleksandër Meksin.

Tashmë për këtë maratonë, e cila do të jetë e standardeve ndërkombëtare e jo vetëm kaq, ka shumë aktorë që janë angazhuar. Sekretari i shoqatës së Rrugës “Egnatia”, Gjon Koliqi, shpjegon se ky veprimtari do të jetë nën kujdesin e kryeministrit të Shqipërisë, Edi Rama. “Jo vetëm kaq, – thotë aui, – por ne kemi takuar dhe zëvendësministrin e Arsimit dhe Sportit, Rauf Dimraj.”

“Ky i fundit ka angazhuar Federatën Shqiptare të Atletikës për gjithë mbështetjen infrastrukturore, – ka vijuar Koliqi. – Më tej akoma ne kemi folur dhe me kryetarin e Bashkisë së Durrësit, Vangjush Dako, i cili është angazhuar për zhvillimin e maratonës në mënyrë korrekte. Mendojmë që do të jetë një veprimtari gjithëpërfshirës, i cili ka për qëllim dhe ringjalljen e interesit për rrugën e vjetër “Egnatia”.”

“Kjo rrugë shkon deri në Lin të Pogradecit. Besojmë se do të kemi dhe mbështetjen e komunitetit evropian, sepse shoqata jonë, e krijuar posaçërisht për rrugën Egnatia, ka pasur për qëllim dhe rritjen e interesit të ndërkombëtarëve për këtë rrugë historike në vendin tonë”, – ka përfunduar Sekretari i Shoqatës së Rrugës “Egnatia”, Gjon Koliqi, duke folur për gazetën “Telegraf”.