Shoqata Evropiane e Rrugës “Egnatia” organizon në bashkëpunim me Shoqatën Italiane të Kulturës dhe Sportit (Komitetet periferike të Frozinones dhe Romës), edicionin e parë të Maratonës Egnatia, e cila do të zhvillohet në Durrës më 28 nëntor të këtij viti. Nisja e garës do të bëhet në ora 09:00, kurse paraqitja dhe rikonfirmimi i sportistëve duhet të jetë në ora 08:00.

Gara, e cila do të ketë gjatësinë e 42 kilometrave e 195 metrave, është e hapur për të gjithë, të cilët janë mirë me shëndetin dhe të aftë për të përballuar Maratonën. Vrapimi do të zhvillohet në një terren të sheshtë dhe nuk ka ndryshime të lartësive gjatë korsisë së garimit. Për matjen e kohës nga gjyqtarët, të gjithë pjesëmarrësve do t’u jepet një “chip”, ndërsa tarifa e pjesëmarrjes përfshin pije, qese me ushqime të ndryshme.

Gjatë garës do të jetë i siguruar shërbim mjekësor, ambulanca do të shoqërojë sportistët, ndërsa pijet do të jenë çdo pesë kilometra në vrapim. Shpërblimi financiar do të jetë për pesë sportistët e klasifikuar në vendet e para. Kategoritë do të jenë; 23-34 vjeç, mbi 35 vjeç, mbi 40 vjeç, mbi 50 vjeç, mbi 55 vjeç, mbi 60 vjeç dhe mbi 65 vjeç. Do të ketë dhe për kategorinë 70-75 vjeç, kurse për femra mosha limit do të jetë 55 vjeç.