ASNN – Diego Armando Maradona e ka nisur në mënyrën më të mirë aventurën si trajner në drejtim të Dorados në Meksikë. Që në ndeshjen e parë, trajneri argjentinas ka marrë fitoren duke mundur 4-1 Tapaçulën. Ekzaltimi i tij për çdo gol të shënuar nga skuadra e tij ka entuziazmuar të gjithë tifozët. Maradona jep një tjetër “shou” në Meksikë, teksa e ka nisur në mënyrën më të mirë të mundshme aventurën si trajner i Dorados.
Skuadra e tij ka mundur 4-1 në fushë të huaj, Tapaçulën. duke siguruar fitoren e parë sezonale në kategorinë e dytë meksikane. Vendimtar me tre golat e tij ka qenë sulmuesi Vinicio Angulo, që ka zbritur në fushë me numrin 10, të njëjtin që e bëri të famshëm në botë yllin argjentinas. Maradona ka luajtur ndeshjen e tij edhe në vijën anësore të fushës, që para vërshëllimës së fillimit të takimit, kur telekamerat e kanë kapur ndërsa mundohej të këndonte himnin meksikan.
Gjatë ndeshjes, ish-trajneri I Argjentinës i ka përgëzuar lojtarët e tij në rastet e shënimit të golave, duke i dhënë kështu mundësi skuadrës së Dorados të largohet nga fundi I tabelës së renditjes. Tifozët meksikanë e kanë miratuar ekspresivitetin e Maradonës, duke i dhuruar atij duartrokitje dhe kore përkrahjeje. Maradona ia ka kthyer me të njëjtën monedhë, duke festuar me ta poshtë pjesës së tifozëve më të zjarrtë, ashtu siç bënte kur ishte edhe vetë ishte futbollist.
