ASNN – Mançester Siti korri një fitore të madhe mbrëmjen e sotme në Ligën e Kampioneve, pasi mundi me rezultatin 3-2 Shalke 04-ën, brenda në fushën e kësaj të fundit në Gjermani. Ishte një ndeshje mjaft e bukur sepse dhuroi surpriza dhe të papritura të këndshme për anglezët. Në fillim shënoi argjentinasi Serxhio Aguerro në minutën e 18-të.
U duk se Siti do ta kishte të lehtë suksesin në këtë ndeshje, por Shalke përmbysi rezultatin brenda pjesës së parë me anë të Nabil Bentalebit, i cili realizoi dy herë dhe në të dy rastet nga pika e bardhë. 11-metërshin e parë e ekzekutoi saktë në minutën e 38-të, kurse tjetrën në minutën e 45-të. Në pjesën e dytë Siti rriti shpejt presionin në sulm dhe ushtroi forcë nga krahët për të çarë mbrojtjen gjermane.
Por sulmet nuk kanë efektin e dëshiruar. Si të mos mjaftonte kjo, Otamendi merr karton të kuq dhe e lë skuadrën angleze me 10 vetë në fushën e lojës. Për ekipin e Guardiolës gjërat vështirësohen, por trajneri katalan i Mançester Sitit nuk u dekurajua. Ai nxiti skuadrën përpara në kundërsulm, dhe strategjia pati efekt pozitiv. Në minutat e fundit të ndeshjes vjen dhe ndëshkimi për Shalken.
Dhe këtë ndëshkim ia jep pikërisht një gjerman, Leroi Sane, i cili realizoi golin e barazimit në minutën e 86-të. Shalke kupton se ky rezultat nuk e ndihmon dhe duke ditur që kundërshtari është me 10 vetë “turret” përpara për të gjetur golin e fitores, por gabon rëndë sepse hapet. Dhe kjo i kushton sepse Rahim Stërling gjen golin e tretë për Sitin në minutën e 90-të.
Duke bërë që anglezët të dalin me fitore 3-2 nga stadiumi i Shalkes dhe të shohin drejt çerekfinaleve. Kjo pasi dueli i kthimit do të luhet në fushën e tyre në stadiumin “Etihad” në Britani pas dy javësh. Deri atëherë, Mançester Siti dhe Pep Guardiola do të jenë të qetë sepse rezultati i marrë sot në mbrëmje i motivon dhe u jep shanse atyre.
