ASNN – Liverpuli ka pësuar humbjen e parë në këtë edicion të Premier Ligës në Angli, pasi u mposht në Stadiumin “Etihad” nga Mançester Siti, me shifrat 2-1. Ishte një ndeshje e nivelit më të lartë, pasi u përplasën dy rivalë direktë për titullin në kampionatin anglez. Nga ana tjetër, ishte një duel mjaft domethënës i dy strategëve në kampet përkatëse, katalani Pep Guardiola, në krye të Sitit, dhe gjermani Jurgen Klop, në krye të Liverpulit.
Kështu, në kuadër të javës së 21-të të Premier Ligës, fiton Mançester Siti 2-1 dhe diferenca midis tyre tashmë është vetëm 4 pikë, me Liverpulin që e mban vendin e parë, ndërsa skuadra e Guardiolës e ndjek në vend të dytë. Ndeshjen e vendosën episodet, por edhe një mbrojtje efikase e Sitit në momentet kulmore të takimit. Në pjesën e parë ishte Serxhio Aguerro që realizoi një supergol, në minutën e 40-të, ndërsa, në pjesën e dytë, spektakli mori trajtën e tij të plotë.
Në minutën e 67-të, braziliani Firmino realizoi golin e barazimit dhe një rezultat i tillë ku Liverpuli dilte me pikë nga kjo ndeshje ia forconte ndjeshëm pozitat dhe objektivat përfundimtare në këtë kampionat. Por pa kaluar 5 minuta nga goli i Liverpulit, ishte një gjerman që do ta trishtonte Jurgen Klopin. Leroi Sane shënoi golin e dytë për Sitin, një gol që rezultoi vendimtar për fitoren e “Qytetarëve”. Liverpuli pëson kështu disfatën e parë në këtë sezon në Premier Ligën Angleze dhe mbetet në kuotën e 54 pikëve.
Kurse Siti ngjitet në vend të dytë me 50 pikë, pra vetëm 4 pikë larg. Në vend të 3-të ndodhet Totenhemi me 48 pikë, kurse në vend të 4-t Çelsi, me 44 pikë. Pesëshja e parë plotësohet nga Arsenali, me 41 pikë. Vetëm vendi i 6-të për Mançester Junajtid të trajnerit të ri Ole Gunar Solskjaer, ku “Djajtë e kuq” anglezë kanë 38 pikë. Tashmë kampionati anglez është tërësisht i hapur dhe për këtë meritë ka skuadra e Sitit me në krye trajnerin Pep Guardiola.
Me fitoren e sotme ndaj Liverpulit, “Qytetarët” e bëjnë garën për trofeun kryesor në futbollin anglez mjaft interesant dhe me plot enigma.
