ASNN – Për portierin Elidon Selaci kanë se çfarë të flasin kolegët e tij njëkohësisht edhe futbollistët e Mamurrasit. Ky gardian do t’i japë siguri prapavijës, ndërsa shpresohet në nisjen e mbarë të pjesës së dytë të sezonit. Dhe për këtë qëllim mamurrzakët besojnë se siguria më e madhe do të vijë nga porta.
Elidon Selaci ka shkëlqyer dhe në ndeshjet miqësore me akrobacitë e tij. Eksperienca e tij si portier në disa ekipe ishte dhe elementi kryesor që ai erdhi si përforcim në janar tek Mamurrasi. Ai do të mbajë peshën kryesore në ekip si portier i saj. Fjalëpak dhe shumë punëtor, i besueshëm për stafin teknik dhe futbollistët e tjerë, duket se Selaci është garancia e ekipit.
Prova e parë në fundjavë është e vështirë, pasi ekipi do të përballet me pretendentët e Besëlidhjes, që kërkojnë Superioren. Ekipi po i bën “hyzmetin” kësaj sfide për të arritur rezultat pozitiv. Dhe për këtë qëllim trajneri Bardhi është duke punuar fort me të gjithë grupin e lojtarëve.
