ASNN – Presidenti i La Ligës, Tebas: Leo Mesi më i miri në histori, kush se pranon s’merr vesh nga futbolli. Edhe pse ai është madrilen, një tifoz shumë i flaktë i Realit të Madridit, thotë se Lionel Mesi është futbollisti më i madh i të gjitha kohërave dhe për të kjo është absolute. Bëhet fjalë për presidentin e Ligës profesioniste spanjolle të futbollit, Havier Tebasin, i cili ka bërë dhe një herë tjetër një deklaratë të shkurtër mbi futbollistin më të mirë në botë.

Duke folur për radiostacionin spanjoll “COPE”, presidenti i La Ligës, Tebas, tha se ndihej i lumtur që adhuronte Leo Mesin për atë që një lojtar futbolli mund të bëjë në fushën e lojës. Ai përmendi emra të mëdhenj si Maradona, Ronaldo e të tjerë, por sipas tij, askush nuk mund të krahasohet me Mesin. Më herët Tebas kishte deklaruar se futbollistët më të mirë në botë duhet të zgjedhin të luajnë për klubet spanjolle, sepse pikërisht në Spanjë luan lojtari më i mirë i histlorisë, argjentinasi Lionel Mesi.

“Ju e dini, unë nuk e kam fshehur që jam tifoz me Realin e Madridit, kjo është botërisht e ditur, por kam një fjalë me ata që nuk vënë Mesin në vend të parë, – u shpreh kreu i La Ligës spanjolle, Havier Tebas, duke folur për radion në fjalë. – Zotërinj, kushdo që thotë se Lionel Mesi nuk është futbollisti më i mirë i të gjitha kohërave, ju siguroj që nuk merr vesh nga futbolli, ai as ka lidhje me këtë sport. Sepse, Mesi është padyshim më i miri që e ka luajtur ndonjëherë këtë sport.”