ASNN – Edhe grupi B i Kategorisë së Parë të Kampionatit Kombëtar të Futbollit i ka luajtur 5 takimet e javës së 18-të, duke konfirmuar Lushnjën dhe Bylisin si pretendentet kryesore për vendin e parë, që të çon sezonin e ardhshëm në Kategorinë Superiore. Lushnjarët nuk kanë gabuar në Berat, duke iu falur edhe një herë, sikundër në fundjavën e shkuar në Gjirokastër ndaj Luftëtarit, një goli të vetëm, të shënuar nga Mikel Canka 19 minuta para fundit të pjesës së dytë.

Lushnjarët kanë 32 pikë, po aq sa ka edhe Bylisi, që nuk gaboi në fushën e vet me Naftëtarin, duke fituar me shifrat 3-1 në një takim ku kuçovarët kanë patur ankesa për gjykimin të cilin ata e kanë quajtur “skandaloz”. Butrinti ka mbetur prapa, në vendin e 3-të, me 28 pikë, pas barazimit pa gola që mori në Gjirokastër përballë vendasve të Luftëtarit, ndërsa një pikë prapa sarandjotëve ka mbetur Sopoti, që u ndal në një barazim 1-1 si skuadër vendase në Pogradec nga Shkumbini.

Pavarsisht humbjes me Lushnjën, Tomori ka marrë vendin e 5-të me 22 pikë, po aq sa ka edhe Pogradeci dhe Dinamo. Kjo e fundit zhgënjeu në Pezë-Helmës, duke u mundur 1-2 pikërisht nga liqenorët. Kjo ishte edhe java e fundit e fazës së dytë të Kategorisë së Parë dhe në bazë të renditjes së të cilës do të përcaktohet edhe kalendari i fazës së 3-të.

Mbi bazën e formulës së adoptuar nga Federata Shqiptare e Futbollit, në këtë fazë të tretë të nivelit të dytë të Kampionatit Kombëtar të Futbollit favorizohen skuadrat e gjysmës së sipërme të renditjes, të cilat 5 nga 9 ndeshjet e kësaj pjese të 3-të të kampionatit do t’i luajnë në fushën e tyre dhe vetëm 4 në fushë të huaj, ndryshe nga ato të gjysmës së poshtme, që do të luajnë më shumë jashtë fushe.

Kategoria e Parë

Java e 18-të

(7 mars 2015)

Të shtunën:

Dinamo – Pogradeci                                    1-2

Shënues: Allmuça 68’(11-m.) / Shkalla 52’(a.g.), Topllari 59’

Kompleksi “Internacional”, Pezë-Helmës

Bylis – Naftëtari                                 3-1

Shënues: Shoshi 18’, Hoxha 25’, Pepa (11-m.) 60’ / Shoshi 51’(a.g.)

Stadiumi “Adush Muça”, Ballsh

Luftëtari – Butrinti 0-0

Stadiumi “Gjirokastra”, Gjirokastër

Sopoti – Shkumbini                         1-1

Shënues: Çaushaj 51’ / A. Magani 37’

Stadiumi “Gjorgji Kyçyku”, Pogradec

Tomori – Lushnja                              0-1

Shënues: Canka 71’

Stadiumi “Tomori”, Berat

Renditja

Nr.       Skuadra         N.        F.         B.        H.        Gsh-Gp          Pikë

1. Lushnja 18        9        5          4        20-9                32
2. Bylis 18        10        2          6        24-19              32
3. Butrinti 18        7        7          4        19-9                28
4. Sopoti 18        7        6          5        17-20              27
5. Tomori 18        7        4          7        13-15              22*
6. Pogradeci 18        6        4          8        15-17              22
7. Dinamo 18        6        7          5        20-16              22**
8. Shkumbini 18        5        4          9        17-22              19
9. Luftëtari 18        5        3          10        11-19              18
10. Naftëtari 18        3        8          7        12-22              17

* Tomorit i janë hequr 3 pikë nga renditja me vendimin e FIFA-s për rastin “Vrucina”.

** Dinamos i janë hequr 3 pikë nga renditja me vendimin e FIFA-s për rastin “Putinçanin”