ASNN – Janë luajtur dje ndeshjet e para të gjysmëfinaleve të “play-off”-it për titull të nivelit më të lartë të Kampionatit Kombëtar të Volejbollit për Femra dhe Tirana dhe Barleti Volej kanë korrur fitore, duke hedhur një hap drejt finales së madhe.

Tirana ka hequr të “zijtë e ullirit” me Skënderbeun në gjysmëfinalen e parë, pasi korçaret, në dukje pak të interesuara për të vajtur më larg se vendi i tretë në këtë kampionat kanë qenë gati për t’u bërë “gjëmën” vajzave bardheblu.

Dëmtimi i organizatores Grabocka në avantazhin e korçareve 11-18 në setin e parë duket se i ka prishur punë skuadrës së Tatjana Marashit, e cila edhe në setin e tretë në avantazhin 20-24 s’e bën dot hapin e madh.

Bardheblutë shumë vuajtje në këtë sfidë gjysmëfinale për titull, por sidoqoftë fitojnë 3-0 në kryeqytet dhe shkojnë në Korçë për ta mbyllur gjithçka në ndeshjen e dytë. Ndërkaq, kampionet në fuqi të volejbollit të femrave në vend janë rikthyer tek fitorja.

Madje ndaj Teutës, në gjysmëfinalen e parë për titullin “kampion”, Barleti Volej ka provuar dhe rezervat. Ka munguar lojtarja e lirë Fagu, por dhe Shabaku, ndërsa pjesa tjetër është aktivizuar e gjitha nga trajneri Gurabardhi, duke fiksuar fitoren 3-0.

Kampionati Kombëtar

i Volejbollit – Femra

Kalendari i gjysmëfinaleve të

“play-off”-it për titullin “kampion”

Të mërkurën, 13 prill 2016:

Tirana – Skënderbeu           3-0      (1-0)

(26-24, 25-20, 26-24)

Barleti Volej – Teuta                        17:00

Të shtunën, 16 prill 2016:

Skënderbeu – Tirana                      14:00

Teuta – Barleti Volej                        17:00

Të martën, 18 prill 2016:

(nëse do të jetë e nevojshme)

Tirana – Skënderbeu                      14:00

Barleti Volej – Teuta                        17:00