ASNN – Veprimtaria më prestigjioze e klubeve të Evropës, Liga e Kampioneve, luan sonte ndeshjet e dyta në grupet E, F, G dhe H dhe takimi më i spikatur është padyshim ai midis Lionit dhe Juventusit. Për trajnerët e të dyja skuadrave, kjo do të jetë një ndeshje e vështirë. Një nga sfidat më të spikatura të mbrëmjes së sotme në Ligën e Kampioneve është sfida franko-italiane, midis Lionit dhe Juventusit, një sfidë që për trajnerin vendas, Bruno Zhenesio, vlen për të gjithë sezonin.

“Mendoj se, për skuadrën, ky është një shans real, një mundësi që, në rast fitoreje, ne mund ta shfrytëzojmë këtë ndeshje si pikë referimi, jo vetëm sa i përket ecurisë sonë të pikëve në Ligën e Kampioneve, por edhe besimit në vetvete për pjesën e mbetur të sezonit në këtë veprimtari”, – ka thënë ai. Fjalëve të trajnerit u ka bërë jehonë edhe kapiteni Maksim Gonalo’, i cili e ka cilësuar sfidën me Juventusi një ndeshje të jashtëzakonshme, por ka theksuar se skuadra e tij është gati.

Ndërkohë, trajneri i Juventust, Masimiliano Alegri, pret një ndeshje të vështirë për të dyja skuadrat. “Ndeshjet e Ligës së Kampioneve janë gjithmonë të vështira dhe të ndërlikuara, por disa ndeshje të tjera shkojnë mirë, – tha kreu i stolit të kampiones në fuqi të Italisë. – Lioni pati një ndeshje të mirë me Seviljen në Evropë, por një ndeshje të vështirë me Nisën në kampionat. Për këtë arsye, kjo përballje e së martës do të jetë një sfidë e vështirë për të dyja skuadrat.”

Kurse ish-futbollisti i Lionit, Miralem Pjaniç, tanimë me Juventusin, e ka vlerësuar si të paharrueshme përvojën me klubin francez, ndërsa ka shprehur kënaqësinë që ritakon shumë miq të tij. Përtej kësaj, mesfushori shikon një ndeshje të vështirë në “Stadë dë Lion”.