ASNN – Kategoria Superiore e Kampionatit Kombëtar të Futbollit ka luajtur të shtunën pasdreke dhe në mbrëmje dy ndeshjet e para të javës së 19-të, duke dhuruar vetëm një gol në 180 minuta, madje edhe atë “in-extremis”. Ai ka ardhur në Korçë, ku Skënderbeu ka mundur me vuajtje Flamurtarin, në një ndeshje që u mbyll me rezultatin 1-0. Fitorja e arritur me Partizanin mori vlera të tjera dhe korçarët tani u bëjnë presion skuadrave që luftojnë për Evropën.
Një takim i cilit u vendos në fund fare, por pati shumë luftë sportive dhe raste nga të dyja krahët. Goli vendimtar erdhi në minutën e 90-të, kur Bregu i ndodhur pranë portës e shtyu topin në rrjetë pas u kthye nga shtylla horizontale. Vlonjati mposhti skuadrën e qytetit të tij dhe i dha 3 pikë me mjaft vlera Skënderbeut. Ndërkaq, është mbyllur me shifrat e bardha, 0-0, takimi mes Vllaznisë dhe Laçit, i luajtur në mbrëmje në Stadiumin “Loro Boriçi” të Shkodrës.
Të dyja skuadrat patën shanse për të shënuar, por goli mungoi dhe në fund ndanë nga një pikë. Gjatë pjesës së parë, Laçi ishte më kërkues dhe pati rastet më të mira për të shënuar. Ndërsa në pjesën e dytë, ishin shkodranët e Vllaznisë ata që i shkuan më afër golit. Ndërkaq, 3 ndeshjet e tjera të javës së 19-të të Kategorisë Superiore luhen të dielën dhe, duke nisur nga ora 16:00, Tirana pret në kryeqytet Luftëtarin, ndërsa Byisi është mysafir në Durrës, për t’u ndeshur me Teutën.
Takimi i fundit dhe ai më i spikatur i javës është dueli i orës 19:00, midis kryesueses së renditjes, Kukësit, dhe kampiones në fuqi, Partizanit, i cili do të luhet në Stadiumin “Arena Kombëtare” në kryeqytet. Ky duel bëhet kështu ndeshja e dytë e Kategorisë Superiore që do të luhet në stadiumin e ri, pas derbit të kryeqytetit, midis Partizanit dhe Tiranës.
