ASNN – Goga Basket vazhdon të ruajë bilancin prej 100 % fitoresh, teksa ka korrur fitoren e 4-t radhazi, duke mposhtur pa probleme në kryeqytet Studentin, 83-41. Ndërsa në takimin tjetër të luajtur dje, të vlefshëm për javën e 5-të të Kategorisë së Parë të Kampionati Kombëtar të Basketbollit për Femra, Vllaznia ka fituar lehtësisht, 80-51, në Vlorë përballë Apolonisë “vendase”.

Goga Basket, skuadra që tashmë drejtohet nga trajneri i ri Henri Moja dhe ndihmësi i tij Fatmir Qehajaj, dje ka treguar në sallën kryesore të Pallatit të Sportit “Asllan Rusi” në kryeqytet, se ka diferenca të mëdha me Studentin e Fiorentina Mitkut. Kjo jo thjesht për fitoren me 42 pikë diferencë, apo për prezencën e të huajave në fushë si boshnjakja Omerbashiç dhe amerikania Harder, por për cilësinë e lojës së shfaqur.

Ndërkaq, ka qenë gjithashtu një fitore e lehtë ajo e Vllaznisë në Vlorë përballë Apolonisë. Një ndeshje e zgjidhur që në dy 10-minutëshat e parë, aty ku Vllaznia ka krijuar epërsinë e mjaftueshëm për të luajtur qetësisht. Apolonia nuk ka pasur forcën e duhur për t’i bërë ballë ekipit mik, ku edhe një herë tjetër ka regjistruar sërish humbje, këtë herë në shifrat 51-80.

Dy takimet e tjera luhen sot para dhe pasdreke dhe, duke nisur nga ora 11:00, Flamurtari pret në Vlorë Kamza Basketin, duke synuar t’i marrë sërish kreun e renditjes Goga Basketit. Ndërsa duke nisur nga ora 13:00, Tirana është mysafire në Korçë, atje ku në Pallatin e Sportit “Nikolla Tamara”, do të përballet me Skënderbeun vendas në takimin që ul siparin e kësaj jave.

Kampionati Kombëtar

i Basketbollit – Femra
Kategoria e Parë

Java e 5-të

(11-12 nëntor 2016)

Të premten:

Apolonia – Vllaznia                         51-80

Studenti – Goga Basket                  41-83

Të shtunën:

Flamurtari – Kamza Basket            ora 11:00

Skënderbeu – Tirana                      ora 13:00

Elbasani                                            pushim

Renditja

Nr.       Skuadra                     N.        F.         H.        Psh-Pp           Pikë

1. Goga Basket             4          4          0          368-210         8
2. Flamurtari                  4          4          0          277-218         8
3. Vllaznia                     5          2          3          330-314         7
4. Tirana                         3          3          0          216-157         6
5. Elbasani                    4          2          2          303-267         6
6. Studenti                     4          2          2          231-237         6
7. Apolonia                    5          0          5          287-433         5
8. Skënderbeu              3          1          2          177-188         4
9. Kamza Basket          4          0          4          205-370         4