ASNN – Volejboll, të kuqtë ruajnë të paprekur kreun. Nis java e 10-të edhe tek meshkujt, Partizani-Studenti 3-0 erdhi drejtpërdrejt në RTSH. Janë luajtur të premten dy takimet e para të javës së 10-të të Superligës së meshkujve në volejboll dhe ndeshja që është sjellë për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH Sport, ka qenë derbi i vogël i kryeqytetit midis Partizanit dhe Studentit. Kjo ndeshje u fitua nga Partizani në 3 sete.
Edhe Kampionati Kombëtar i Volejbollit për meshkuj është rikthyer të premten në parket me takimet e javës së 10-të dhe ka spikatur derbi i vogël i kryeqytetit midis Partizanit dhe Studentit. Dhe të kuqtë e drejtuar nga trajneri Ylli Tomori kanë vijuar të ruajnë kryesimin me pikë të plota, teksa ka korrur fitoren e 10-të radhazi. Partizani e ka marrë setin e parë bindshëm, 25-14, duke qenë po kaq bindës edhe në setin e dytë, të fituar 25-15.
Studenti do të përpiqet të reagojë në setin e 3-të, duke luftuar deri në fund, por është sërish Partizani që e fiton edhe setin e 3-të, 25-23, dhe gjithë ndeshjen 3-0 dhe mbetet i shkëputur në krye të renditjes, me 30 pikë, 9 më tepër sesa Erzeni, që është mundur 1-3 (25-22, 18-25, 21-25, 21-25) në Shkodër përballë Vllaznisë, që ngjitet në kuotën e 20 pikëve, në vendin e 3-të. Dy takimet e fundit të javës së 10-të, Skënderbeu-Teuta dhe Tirana-Elbasani, luhen të shtunën.
