ASNN – Vazhdon java e 8-të, Laçi dhe Partizani, fitore identike, 2-0, ndaj Teutës dhe Kastriotit. Janë luajtur të dielën dy takime të tjera të javës së 8-të të Kategorisë Superiore dhe Laçi dhe Partizani kanë korrur fitore identike, 2-0, përkatësisht në fushë e vet ndaj Teutës dhe në fushë të huaj ndaj Kastriotit. Takimi i fundit i kësaj jave, Egnatia-Vllaznia, luhet të hënën pasdreke në Rrogozhinë. Kpshtu, Partizani ka gjetur fitoren e parë të këtij sezoni në kampionat, teksa në duelin e vlefshëm për javën e 8-të të Kategorisë Superiore, ka mposhtur Kastriotin me shifrat 2-0, me nga një gol të shënuar për secilën pjesë loje.
Në fakt, takimi i luajtur në Stadiumin e Kamzës ka parë Partizanin ta nisë më mirë dhe, në minutën e 10-të, Rrapaj jep një pasim të gjatë, duke nxjerrë Malën para portierit. Prekja e mesfushorit bën që topi të kalojë Salin, por pa patur shënjestrën e duhur, duke kaluar jashtë atë katërkëndorit. Në minutën e 37-të, vjen edhe goli i parë i Partizanit. Goditje dënimi e shkëlqyer e Mustës nga mbi 25 metra dhe topi shkon aty ku Sali nuk mund ta arrijë dhe përshëndet rrjetën. Me epërsinë minimale të Partizanit mbyllet pjesa e parë, ndërsa e dyta shikon krutanët të provojnë në minutën e 57-të, kur Prodani harkon nga e majta në shtyllën e dytë për Nezirin i cili gjuan fluturimthi.
Por Teqja është i vëmendshëm dhe grushton jashtë. Minuta e fundit e kohës së rregullt do të sjellë edhe golin e dytë të kryeqytetasve, pas një kundërsulmi të shpejtë që finalizohet nga Rrapaj. Partizani mposht kështu Kastriotin me shifrat 2-0 dhe lehtëson trysninë mbi trajnerin Ilir Daja. Ndërkaq, në takimin tjetër të javës së 8-të, të luajtur gjithashtu të dielën pasdreke, Laçi ka mposhtur me të njëjtat shifra Teutën, gjithashtu me nga një gol të shënuar për secilën pjesë loje. Në fund të pjesës së parë, vjen një goditjeje dënimi nga Mentor Mazrekaj, që ishte në fakt gjysmë gjuajtje dhe gjysmë harkim dhe topi përfundon në rrjetës pa u devijuar nga asnjë futbollist.
Edhe në pjesën e dytë, është Laçi që mbizotëron dhe këmbëngul më tepër, ndërsa në krahun tjetër, detyra e Teutës bëhet edhe më e vështirë 11 minuta para fundit, teksa Xhekson ndëshkohet me karton të kuq, duke e lënë skuadrën durrsake me 10 lojtarë. Nga kjo përfitojnë kurbinasit, që në minutën e parë shtesë të kohës së rregullt, anë të Guindosë, realizojnë golin e dytë, pas disa kombinimeve dhe sulmuesi tregohet i saktë para porte duke mos gabuar atë goditje. Laçi mposht kështu Teutën 2-0 dhe ngjitet hëpërhë në vendin e 4-t të renditjes, me 8 pikë, një më pak sesa durrsakët.
