ASNN – Kategoria e Parë, luhen 4 takimet e para, Apolonia-Tomori mbyllet 0-0, Lushnja-Bylis (15:00) të dielën, drejtpërdrejt në Rrjetin e RTSH-së. Kategoria e Parë e Kampionatit Kombëtar të Futbollit ka nisur të shtunën fazën e 3-të të saj, me 3 takimet e para të javës së 19-të. Siç dihet, në bazë të formulës së miratuar paraprakisht, pikët e skuadrave, të grumbulluara brenda dy fazave të para, janë përgjysmuar dhe vetë skuadrat e dy grupeve, atij të Veriut dhe atij të Jugut, janë ndarë më tej në dy nëngrupe.

5 skuadrat e gjysmës  së sipërme të renditjes vijojnë më tej përballjen me njëra-tjetrën, me sistem vajtje-ardhje, betejën për ngjitjen në Kategorinë Superiore, ndërsa 5 skuadrat e gjysmës së poshtme, vijojnë më tej përballjen me njëra-tjetrën, me sistem vajtje-ardhje, betejën për të qëndruar në Kategorinë e Parë dhe për të mos zbritur në atë të dytën. Kështu, të shtunën,  në zonën e “play-out”-it të grupit A janë luajtur takimet Burreli-Shënkolli 2-1 dhe Iliria e Fushë-Krujës – Veleçiku i Koplikut 3-1.

Kurse në zonën e “play-off”-it në grupin e Veriut, të shtunën është luajtur takimi Korabi i Peshkopisë-Vllaznia, kurse përballja Besëlidhja Erzeni luhet të dielën. Ndërkaq, në zonën e “play-out”-it në grupin B, apo grupin e Jugut, të shtunën është luajtur vetëm përballja Apolonia-Tomori, një përballje që erdhi për sportdashësit drejtpërdrejt nga Rrjeti i Radio-Televizionit Shqiptar. Kjo sfidë ka dhuruar emocione dhe raste për të dyja skuadra, por është mbyllur me rrjeta të paprekura.

Takimi tjetër i “play-out”-it, Elbasani-Pogradeci, luhet të dielën, ashtu sikundër luhen të dielën edhe dy sfidat e zonës  së “play-off”-it. Aty ku Egnatia pret në Rrogozhinë Besën, ndërsa Bylisi kryesues është mysafir në Lushnjë, për t’u ndeshur me skuadrën vendase, në takimin që do të vijë për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 15:00.

Kategoria e Parë

Grupi i Veriut

“Play-off”-i:

02/03/2019

Korabi Peshkopi – Vllaznia                        0-1

03/03/2019

Besëlidhja –  Erzeni Shijak             (15:00)

“Play-out”-i:

02/03/2019

Burreli – Shënkolli                                        2-1

Iliria Fushë-Krujë – Veleçiku Koplik          3-1

Grupi i Jugut

“Play-off”-i:

03/03/2019

Egnatia Rrogozhinë – Besa                       (15:00)

Lushnja – Bylisi                                                        (15:00)

“Play-out”-i:

02/03/2019

Apolonia – Tomori                                        0-0

03/03/2019

Elbasani – Pogradeci           (15:00)