ASNN – Janë luajtur të shtunën 4 ndeshjet e para të javës së 20-të të nivelit të dytë të Kampionatit Kombëtar të Futbollit, Kategoria e Parë, dhe Bylisi e Elbasani bëjnë detyrën, ndërsa Flamurtari rikthehet te fitoret me Memushin. Ndeshjet e javës së 20-të në Kategorinë e Parë kanë dhuruar fitore të skuadrave të kreut, me Bylisin dhe Elbasanin, që kanë siguruar tre pikët edhe pse përballë nuk kishin kundërshtarë shumë të thjeshtë.

Të dy ekipet kanë fituar me të njëjtat shifra 3-1, me ndryshimin që Bylisi triumfoi në shtëpi përballë Apolonisë ndërsa Elbasani mundi në fushë të huaj Tomorin. Pas krahëve të tyre, në kërkim të vendit të 3-të, ka rigjetur fitoren Flamurtari i cili mposhti me rezultatin 4-2 Burrelin, në një sfidë shumë interesante e cila në fakt u vu në diskutim në minutat e fundit nga golat e miqve.

Ndërkohë, një gol i Xhabrahimit në fundin e ndeshjes i dha fitoren 2-1 Vorës përballë Korabit, për të ruajtur pikërisht vendin e tretë në ndjekje të dy kryesuesve. Ndërkaq, ndeshja e 5-të e kësaj jave është ajo që luhet sot pasdreke në Stadiumin “Redi Maloku” të Fushë-Krujës, aty Kastrioti pret Lushnjën, ndërsa ajo e fundit, “derbi” midis Luzit 2008 dhe Besës, luhet të hënën në Stadiumin “Roza Haxhiu” të Lushnjës.

Kategoria e Parë

Java e 20-të

Të shtunën, 10 shkurt 2024:

BYLIS – APOLONIA                                     3-1

Shënues: Kamara 56’, Kastrati 65’, Xheferson 72’/ Omeri 90’+3

FLAMURTARI – BURRELI                         4-2

Shënues: Batha 30’, Diamanti 31’, Shkurtaj 65′, Lleshi 90’+4 / Sidibe 82’(ag), Andrade 85’

KORABI – VORA                                          1-2

Shënues: Mziu 32’/ Shani 8’, Xhabrahimi 90’+22

TOMORI – ELBASANI                                 1-3

Shënues: De Oliviera 72’/ Telushi 19’, Lleshi 43’, Melo 61’

Të dielën, 11 shkurt 2024:

KASTRIOTI – LUSHNJA                             (13:30)

Të hënën, 12 shkurt 2024:

LUZI 2008 – BESA                                       (13:30)